Ի դեպ. Նախագահի՝ օրենքները ստորագրելու, ԼՀԿ հայտարարության ու Միքայել Մինասյանի գրառման մասին (տեսանյութ)

Ի դեպ, չնայած ամառ է ու ասում են, թե ամառը լավագույն ժամանակը չէ, տարվա լավագույն եղանակը չէ քաղաքականության համար,Հայաստանում իրադարձությունները զարգանում են գլխապտույտ արագությաբ։ Իրադարձությունները չեն դադարում անգամ գիշերը, նկատի ունեմ նախագահի՝ գիշերով օրենքներ ստորագրելը, չեն դադարում առավոտ՝ նկատի ունեմ ԼՀԿ-ի ասուլիսը, չեն դադարում կեսօրին ու ցերեկը, երբ Միքայել Մինասյանը նորից հիշեցրեց իր մասին, այս անգամ կոշտ քննադատության ենթարկելով ոչ թե Նիկոլ Փաշինյանին, այլ Էդմոն Մարուքյանին։ Բայց, ամեն ինչի մասին հերթով։ Գիշեր էր, արարատյան դաշտավայրի մութ գիշերներից մեկը: Արևի ճառագայթներ չկային, Մասիսի սպիտակափառ գագաթը չէր երեւում, որ փայլեր, կամ չփայլեր, բայց հանկարծ գիշերվա մեջ ինչ որ բան զրնգաց։

Ժամը ուշ էր արդեն, 12-ն անց 47, երբ Նախագահ Արմեն Սարգսյանը ստորագրեց օրենսդրական փոփոխությունների փաթեթը, նաեւ այն մասին, որ ինքը չի ստորագրելու ԱԺ-ի կողմից ընդունված օրենքը՝ սահմանադրական փոփոխությունների մասին։Դե պատկերացրեք իշխանական կողմի հրճվանքն ու ընդդիմադիրների զայրույթը։ Պատկերացրեք նաեւ քննադատության այն տարափը, որ թափվեց նախագահի գլխին, իր ծննդյան օրվա ավարտից անմիջապես հետո՝ 12 անց 47-ից սկսած։ Ընդդիմության գնահատականը չափազանց կոշտ էր՝ նախագահը ստորագրեց սեփական ինքնաոչնչացման արձանագրության տակ։

Սպասում էինք լույսը բացվի, բարի հետը։ Առավոտ 10-ին արդեն ԼՀԿ-ի հերթն էր։ ԼՀԿ-ն պիտի հայտարարեր իր որոշման մասին՝ միանո՞ւմ է ԲՀԿ-ին, Սահմանադրական փոփոխությունների սահմանադրականության հարցը ՍԴ-ում վիճարկելու հարցում, թե ոչ։ ԼՀԿ-ն, այս իմաստով բավական դժվար իրավիճակում էր հայտնվել, ինչպես ասում են՝ «հետեւը սուր, առաջը ջուր»։ Մտածում էինք այլ ճանապարհ չկա, բայց ԼՀԿ-ն, պարզվում է, գտել էր այնքան հարազատ 3-րդ ճանապարհը։ Հայտարարվեց, թե «Լուսավոր Հայաստան»-ը չի միանա «Բարգավաճ Հայաստան»֊ի ստորագրահավաքին՝ Սահմանադրական դատարան դիմելու հարցով: «Լուսավոր Հայաստան»-ը Սահմանադրական դատարան կդիմի հուլիսի 7-ից հետո, երբ Քոչարյանի գործով դատարանն արդեն նիստ անցկացրած կլինի:ԴԵ արի ու հասկացիր՝ սա ճկունություն էր, թե աճպարարություն։ Եւ հենց այստեղ «ձայն մը հնչեց» «վատիկանի խոհանոցից»։Միքայել Մինասյանն էր «անարգանքի սյունին» գամում Էդմոն Մարուքյանին, որ Իր հետ ասոցացվելու վախից դարձել է խամաճիկ, իշխանության կցորդ, կործանելով նաեւ բազմաթիվ փայլուն երիտասարդների ապագան ու քաղաքական կարիերան։Ավելին՝ Մինասյանի համոզմամբ, Էդմոն Մարուքյանը խփել է Հայաստանի ժողովրդավարության դագաղի վերջին մեխը։Մի խոսքով, Մինասյանը Մարուքյանին ինչքան ուզեց, էդքան խփեց։ Սպասվում է, որ հաջորդիվ Մարուքյանը կհարցնի՝ էդ սպառնը՞մ եք։ Հենց այսպես էլ ապրում ենք մեր սիրած երկրում։

Այս թեմայով Ի դեպ. Նիկոլ Փաշինյանի առաջարկի ու Արա Այվազյանի հրաժարականի մասին Ի դեպ. Հայ զինվորների գերեւարման ու Նիկոլ Փաշինյանի նոր առաջարկի մասին Ի դեպ. Ադրբեջանական ագրեսիայի, ՀԱՊԿ-ից ակնկալիքների ու ՄԱԿ ԱԽ չդիմելու մասին Ի դեպ. Լեւոն Տեր Պետրոսյանի հոդվածին Ռոբերտ Քոչարյանի պատասխանի մասին Ի դեպ. Լեւոն Տեր Պետրոսյանի հոդվածի մասին