Ի դեպ. Սահմանադրական փոփոխությունների ու քաղաքական արձագանքների մասին (տեսանյութ)
Ի դեպԻ դեպ, Սահմանադրական փոփոխությունների աղմկահարույց նախագիծը, որ նախօրեին երկրորդ ընթացմամբ ընդունվեց ԱԺ-ում, բազմաթիվ հարցեր ու բուռն քննարկումներ է առաջացրել որ միայն մասնագիտական շրջանակներում, այլեւ քաղաքական դաշտում։Այս առումով ակտիվ է հատկապես արտախորհրդարանական ընդդիմությունը։ ՀՀԿ-ն հայտարարում է, որ տեղի ունեցածը իշխանության յուրացում է, որ սրա քրեական և քաղաքական ողջ պատասխանատվությունն ընկած է անձամբ Նիկոլ Փաշինյանի և ներկայացված փաթեթին կողմ քվեարկած ԱԺ պատգամավորների վրա, որ պետականության քայքայման գործընթացն անխուսափելիորեն բերելու է անդառնալի կորուստների, որոնցից խուսափելու միակ ճանապարհը Նիկոլ Փաշինյանի հեռացումն է իշխանությունից ։ՀՅԴ-ն դիմում է հանրապետության նախագահին, որպես պետության գլուխ, նշված հակասահմանադրական գործընթացի վերաբերյալ արտահայտել հստակ դիքորոշում և ձեռնարկել անհրաժեշտ գործողություններ: Արթուր Վանեցյանի «Հայրենիք» կուսակցությունը հանդես է գալիս «Սահմանադրական կարգի վերականգնման կոմիտե» ձևավորելու նախաձեռնությամբ և այդ նպատակով սկսում է շտապ խորհրդակցություններ՝ պետության ապագայով մտահոգ բոլոր հասարակական-քաղաքական ուժերի հետ։Ինչ վերաբերում է խորհրդարանական ընդդիմությանը, ապա շատ հստակ ու հասկանալի է ԲՀԿ դիրքորոշումը ։Գագիկ Ծառուկյանի հետ կապված պատմության համապատկերում ԲՀԿ-ն բնականաբար պիտի ընդդիմանար։ Չնայած այնքան էլ միանշանակ չէ, որ հնարավոր է հարցը հասցնել ՍԴ, այդուամենայնիվ ԲՀԿ-ն հղում անելով ՀՀ Սահմանադրության 169-րդ հոդվածի առաջին մասի 2 կետին, նախաձեռնել է ԱԺ պատգամավորների մեկ հինգերորդի ստորագրահավաք՝ խորհրդարանի կողմից ընդունված որոշման սահմանադրականության հարցով Սահմանադրական դատարան դիմելու համար: Բանն այն է, որ ԲՀԿ-ն միայնակ չի կարող ապահովել պատգամավորների մեկ հինգերորդը եւ հարկադրված է դիմել «Լուսավոր Հայաստան» կուսակցության գործընկերներին ՝ այս նախաձեռնությանը միանալու կոչով։ Չնայած նախօրեին ԼՀԿ-ն հայտարարել էր, թե պատգամավորներն իրավունք չունեն նման հարցով դիմել ՍԴ, բայց իրենք քննարկումներ են անում ԲՀԿ-ի հետ՝ լուծումներ գտնելու համար: Ստացվում է, որ անկախ ամեն ինչից, ԼՀԿ-ն հայտնվել է բավական բարդ իրավիճակում։ Ընդդիմությունը հորդորում -համոզում է միանալ, բայց դա կընկալվի որպես միացում սեւերին։Չմիանալը՝ կընկալվի որպես ծածուկ ծառայություն իշխանությանը։ ԼՀԿ-ի սիրած 3-րդ ճանապարհը փակ է, այն տանում է փակուղի։ Եւ ստացվում է, որ ցանկացած որոշման դեպքում ԼՀԿ-ն հարվածներ է ստանալու հակառակ կողմից։ Ինչպես ասում են՝ հետեւը սուր, առաջը ջուր։ Ամեն դեպքում կողմնորոշվել պետք է, իսկ դրա համար ժամանակը՝ քիչ։
