Ի դեպ. ԲՀԿ նախագահի շուրջ զարգացումների մասին
Ի դեպԻ դեպ, չնայած բազմաթիվ անորոշություններին, շատ մասնագետներ այն կարծիքին են, որ Հայաստանը համաճարակի պիկին է, կայունացման մեջ եւ առաջիկայում վարակի տեմպերը սկսելու են իջնել։ Նույնը չի կարելի ասել ներքաղաքական զարգացումների մասին։Այստեղ զարգացումները դեռ ծավալվում են, բայց պիկին դեռ չեն հասել։ Անցած կիրակին, երբ ԲՀԿ առաջնորդը հայտնվեց ԱԱԾ գործողությունների առանցքում, ներքաղաքական զարգացումների պիկը չէր։ Այո, նրա տանը մի քանի ժամանոց խուզարկություն կատարվեց, ապա նա մի քանի ժամ հարցաքննվեց ԱԱԾ-ում, բայց պիտը դեռ առջեւում է։
Մինչ այդ փորձագիտական շրջանակները քննարկում են երկու կողմերի տեսակետները՝ գործընթացների քաղաքական թե իրավական լինելու մասին։ Իշխանությունը պնդում է, որ ԲՀԿ-ն պարզապես քաղաքական փաթեթավորում է տալիս իրավական գործընթացներին, եւ որ նրա այսպես ասած «փորացավը» ոչ թե կորոնավիրուսի դեմ պայքարն է, կամ ժողովրդի սոցիալ-տնտեսական վիճակը, այլ ԲՀԿ առաջնորդի դեմ հարցուցված քրեական գործերը։ԲՀԿ-ն ճիշտ հակառակն է պնդում՝ ԱԱԾ գործողությունները հաջորդեցին Գագիկ Ծառուկյանի քաղաքական հայտարարությանը, եւ ուրեմն իշխանությունը քաղաքական հետապնդում է իրականացնում։Այսպես, թե այնպես, գործընթացը քաղաքական է այնքանով, որքանով դա վերաբերում է խորհրդարանական կուսակցության, ամենամեծ ընդդիմադիր խմբակցության առաջնորդին։
Փորձագետները զուգահեռներ են տանում 2015թ-ի համանման իրադարձությունների հետ, երբ Գագիկ Ծառուկյանը հայտարարեց, թե իր կյանքի գործն է համարում Հայաստանը չարիքի իշխանությունից ազատելը, սակայն ՀՀԿ հայտնի նիստից հետո հայտարարեց իր կյանքի քաղաքական էջը փակելու մասին, դա բացատրելով ժողովրդին արյունահեղությունից հեռու պահելու անհրաժեշտությամբ։Այդ էջը վերաբացվեց ընտրությունների նախաշեմին եւ հիմա պատմությունը, որոշ տարբերություններով, կրկնվում է։Միայն, թե այս անգամ Գագիկ Ծառուկյանը կարծես ավելի վճռական է տրամադրված եւ երդվում է ետքայլ չանել։ Ոչ պակաս վճռական է տրամադրված նաեւ իշխանությունը։
Ոչ ոք չի կարող նույն գետը մտնել երկրորդ անգամ, նույնիսկ մեծ ցանկության դեպքում, իսկ այս անգամ, կողմերից ոչ մեկը նման ցանկություն չունի։ Գագիկ Ծառուկյանի հետ կապված զարգացումները կարծես արագացրել են ընդդիմադիր դաշտի համախմբման գործընթացները, այդ մասին են վկայում ընդդիմադիր կուսակցությունների խորհրդատվական հանդիպումները։ Իսկ իրավական գործընթացների տրամաբանությունն հուշում է, որ առաջիկայում ԱԺ-ը պետք է քննարկի ԲՀԿ առաջնորդին պատգամավորական անձեռնմխելիությունից զրկելու հարցը, նրան կալանավորելու հեռանկարով։ Սպասենք Հանրապետության գլխավոր դատախազի միջնորդությանը ԱԺ-ում։Կամ՝ նրա հրաժարականին։
