Ի դեպ. Ուժային կառույցների ղեկավարների փոփոխության մասին
ADTVԻ դեպ, Հայաստանում տեղի ունեցան ուժային կառույցների ղեկավարների հերթական պաշտոնանկությունները, նրանց փոխարեն նշանակվեցին նորերը։ ԱԱԾ տնօրենի, Ոստիկանապետի ու ԶՈՒ գլխավոր շտաբի պետի հրաժարականների կամ ազատումների պատճառների մասին մասին պաշտոնական հաղորդագրությունները, ինչպես միշտ, չափազանց ժլատ են, կամ պարզապես լուռ։
Մնում է ենթադրել, թե ինչու էր հերթական անգամ անհրաժեշտություն առաջացել փոխել այս բարձրաստիճան պաշտոնյաներին։ ԶՈՒ գլխավոր շտաբի պետի պարագան, թվում է, թե մի փոքր այլ է՝ նա պարետատան սահմանված կանոնների խախտումով կազմակերպել էր որդու հարսանիքը, չնայած ինքն այդպես չէր կարծում, ինչը մեծ աղմուկ բարձրացրեց համացանցում ու սոցցանցերում եւ կարծես թե օրենքի, կարգուկանոնի առջեւ բոլորի հավասարության սկզբունքը վարչապետին հարկադրում էր գնալ նման որոշման։ Հավանաբար հենց սա նկատի ուներ վարչապետ Նիկոլ Փաշինյանը, երբ ասում էր, թե չի կարող լինել էնպիսի մի իրավիճակ, երբ որևէ պետական բարձրաստիճան պաշտոնյայի գործողությունները, եթե դրանք նույնիսկ դե յուրե առնչությունների խնդիր ունեն, հակասեն վարչապետի տված հրապարակային ուղերձներին։
Չի կարող լինել այնպիսի իրավիճակ, որ պետական բարձրաստիճան պաշտոնյայի գործողությունները հակասեն վարչապետի ասած տեքստին և կոնտեքստին և դրան չհետևի կոնկրետ գործողություն։ Եւ ուրեմն կոնկրետ գործողությունը հետեւեց։ Հետաքրքիր է սակայն, թե այդ կոնկրետ գործողությունը ինչ պատճառով հետեւեց ուժային մյուս երկու կառույցների ղեկավարներին։ Ի դեպ, հեղափոխությունից հետո Նիկոլ Փաշինյանն արդեն նշանակում է ԱԱԾ 3-րդ տնօրենին ու 3-րդ Ոոստիկանապետին։
Նիկոլ Փաշինյանին աջակցողներն անգամ, էլ չեմ խոսում չաջակցողների մասին, մեկ անգամ չէ, որ խոսել են իշխանության կադրային խնդիրներից։ Ինքը,Նիկոլ Փաշինյանը մեկ անգամ չէ, որ խոսել է համակարգի դիմադրության մասին։ Իսկ համակարգ ասվածը նաեւ մարդիկ են, կադրերը։ Խնդիրն էլ ավելի է սրվում, երբ խոսքը ուժայիններին է վերաբերում։ Այստեղ նոր նշանակումների համար նաեւ օրենսդրական սահմանափակումներ կան, եւ դա հաղթահարելու համար էր ԱԱԾ տնօրենի գլխապտույտ առաջխաղացման շքերթը՝ օրենքի տառին համապատասխան։ Ինչեւէ. Կադրերի հարցում վարչապետը դեռեւս փնտրտուքների մեջ է։
Ընդդիմությունն ասում է հավատարիմ ու ենթակա, իշխանությունն ասում է համախոհ ու պրոֆեսիոնալ կադրերի։ Ամեն դեպքում ուժային կառույցներում առաջին դեմքերի փոփոխությունը իշխանության առաջին դեմքի կոշտ կամքի դրսեւորում է, ինչը երեւի թե արդարացված է համաճարակային ու ներքաղաքական սրացումների այս բարդ ժամանակաշրջանում։ Կադրերն են որոշում ամեն ինչ, բայց անփոխարինելի կադրեր էլ չկան։
