Ի դեպ. Կառավարության 2019թ-ի ծրագրի կատարման եւ արդյունքների մասին

Ի դեպ, ԱԺ-ում այսօր քննարկվում էր կառավարության 2019թ-ի ծրագրի կատարման եւ արդյունքների մասին տարեկան զեկույցը։ Այն ներկայացնում էր վարչապետն Նիկոլ Փաշինյանը։ 2019-ը հետհեղափոխական կառավարության գործունեության առաջին լիարժեք տարին էր եւ հենց դա էր, որ մեզ պետք է լիարժեք պատկերացում տար հետհեղափոխական կառավարության ու քաղաքական մեծամասնության պոտենցիալի մասին,-ասաց վարչապետը, թվարկելով ձեռքբերումները։ Նա կարեւոր համարեց արձանագրել, որ 2019թ-ին հաջողվել է գրանցել 2008-ից ի վեր ամենաբարձր տնտեսական աճի մակարդակը՝ 7.6 տոկոս, որն, ըստ վարչապետի, ամենաբարձրն է տարածաշրջանի, ԵԱՏՄ և եվրոպական երկրների մեջ:

Նիկոլ Փաշինյանը նաև հիշեցրեց, որ կառավարության ծրագրով նախատեսված է մինչև 2023թ.-ը էապես կրճատել ծայրահեղ աղքատության ցուցանիշը: Հայաստանում աղքատության մակարդակը նվազել է, բայց 700 000 մարդ դեռ աղքատ է։ Առաջիկա 5 տարիներին ՀՀ կառավարության գործունեությունը միտված է լինելու բարձր տեխնոլոգիական, արդյունաբերական և բնապահպանական չափանիշներին համապատասխանող, արտահանմանը միտված, որակյալ տնտեսության կառուցմանը: Ինչեւէ, վարչապետը խոսեց գրեթե բոլոր ոլորտներում ձեռքբերումների ու արդյունքների մասին, ներքին խնդիրներից մինչեւ արտաքին քաղաքականություն։

Բայց ավելի ուշագրավ էին արձանագրումները ձախողումների մասին։ Խնդիրներից մեկը, ըստ վարչապետի, այն է, որ չեն կարողացել լուծել անկախ, վստահելի դատական համակարգ ունենալու հարցը: Ինչու՞։Վարչապետի բացատրությամբ, գոյություն ունի մեկ պատճառ. մենք իրո՞ք ուզում ենք, որ ՀՀ-ում լինի անկախ, օրինական, վստահելի դատական համակարգ: Ոչ թե՝ ուզում ենք իշխանության, հեղափոխության կամ նույնիսկ ժողովրդի համար վերահսկելի դատական համակարգ, այլ իսկապես ուզում ենք, որ ՀՀ-ում լինի անկախ դատական համակարգ: Մի խոսքով, սա դեռ չի հաջողվել, քանի որ այս երկու տարիներին չեն ուզել և չենք ուզում թացը չորին խառնել։

Թացը չորին չխառնելու համար երկու տարին շատ է թե քիչ, դժվար է ասել, բայց համարենք բավարար։ Հաջորդը՝ կոռուպցիայի դեմ պայքարն է։ 2019թ-ից մինչ օրս շարունակվող ամենամեծ ձախողումը ժողովրդից գողացված փողերի վերադարձի գործընթացն է եղել։ Թեեւ, Նիկոլ Փաշինյանը 100 տոկոսով համոզված է, որ ընթացող քննությունների արդյունքներով 100 տոկոսով կբացահայտվի կոռումպացված ամբողջ համակարգն իր ճյուղերով, գործող անձանցով եւ ամբողջ շրջանառությամբ։ Ճիշտ է, դատաիրավական համակարգում առկա այս վիճակի պարագայում վարչապետի համոզմունքը գուցե ավելի շատ լավատեսական է, քան ռեալ, բայց կարեւորն այլ բան է։ Այն, որ խնդիրների գույքագրումն ու դիագնոստիկան բավական ճշգրիտ են։Սպասենք արդյունքներին։