Ի դեպ. Ալեն Սիմոնյան- Արթուր Դանիելյան ծեծկռտուքի մասին
Ի դեպՀանրային շրջանակների քննարկման կիզակետում նախօրեին տեղի ունեցած փողոցային ծեծկռտուքն է՝ ԱԺ փոխնախագահ Ալեն Սիմոնյանի եւ Ադեկվատ միաբանության անդամ Արթուր Դանիելյանի միջեւ։ Սկզբում տեղեկություններ տարածվեցին, թե Արթուր Դանիելյանը հարձակվել է Ալեն Սիմոնյանի վրա։ Մյուս կողմն անմիջապես հայտարարեց, թե տեղի ունեցածը իշխանության կողմից հերթական սադրանքն է եղել, որ նախահարձակը, կամ սադրողը Սիմոնյանն է եղել, եւ որ նա է առաջինը հարվածել։ Օրվա ավարտին արդեն տեղի ունեցածի իր վարկածը ներկայացրեց Ալեն Սիմոնյանը։ Ըստ այդ, Արթուր Դանիելյանն ի պատասխան իր բարեւի, սեռական բնույթի հայհոյանք է հնչեցրել, ավելի կոնկրետ՝ ասել է բարեւ Բ-ի տղա, ինքն էլ՝ գլխով հարվածել ու վնասել է Դանիելյանի քիթը։
Պարզվեց, այս հակասությունը նոր չէ ու նրանք դեռ հնուց եկող հաշիվներ ունեն։ Ինչեւէ, երկու կողմն էլ դիմում են ներկայացրել հանցագործության մասին։ Հետո գործին խառնվեցին իրավաբանները՝ երկու կողմերի փոստաբանները։ Դանիելյանի փաստաբաններն ասում են, թե Ալեն Սիմոնյանի հայտարարությունը մի կողմից խոստովանական ցուցմունք է առերեւույթ կատարված հանցագործության մասին, մյուս կողմից՝ հաստատում է Դանիելյանի կողմից կատարած արարքում քրեական օրենսգրքով նախատեսված «խուլիգանություն» արարքի հանցադեպի բացակայությունը:
Նրանք շեշտում են, որ հայհոյելը հանցանք չէ, իսկ ի պատասխան հարվածներ հասցնելը, որն առաջացրել է մարմնական վնասվածքներ, քրեական օրենսգրքով նախատեսված արարք է: Սիմոնյանի փաստաբանն ասում է, թե՝ «բառախաղով թող չզբաղվեն, փաստերը պետք չէ կտրել, ասել, թե հայհոյանքը պատժելի չէ, ապտակելը պատժելի է։ Ամեն ինչը պետք է ամբողջական շղթայի մեջ նայել։ Երբ պարկեշտ մարդուն ծնող ես հայհոյում, դրա հետևանքը դու պետք է բացատրես։
Ի՞նչ է, դու հենց այնպես կանգնած էիր՝ Ալեն Սիմոնյանը եկավ քեզ ապտակե՞ց, Ալեն Սիմոնյանն էլ ընդհանրապես գործ չուներ՝ մտածում էր, որտեղ գտներ քեզ, որ ապտակե՞ր։ Հայհոյանք ես տվել՝ տղավարի ստացել ես»։ Խնդիրն իհարկե իրավական դաշտում է եւ իրավապահների գործն է պարզելը, թե ինչպիսին է դեպքերի ամբողջական շղթան, ով ինչ է արել, ով անմեղ է, ով մեղավոր, կամ ով ինչքան է մեղավոր։
Բռնությունն իհարկե լուծում չէ եւ այն պետք է պատասխանատվություն ենթադրի՝ օրենքով սահմանված կարգով։ Բայց օրենքները լինում են նաեւ չգրված։ Լինում են դեպքեր ու պահեր, երբ ամենաօրինապահ մարդն անգամ չի կարող կառավարել իր վարքը, երբ հայհոյում են մորը, կնոջը, երեխաներին, ընտանիքը։ Հասարակական-քաղաքական ամենասուր բանավեճի, հակադրության ու հակամարտության, ատելության դեպքում անգամ, անընդունելի է ներքաշել ու վիրավորել դիմացինի ընտանիքի անդամներին, հորն ու մորը, որ կողմից էլ այն լինի։ Սեյրան Սարոյանին հիշեցի, որ ասում էր՝ «դու ի՞նչ գործ ունես խալխի մորերու հետ»։
