Ի դեպ. հանրաքվեի ԱՅՈ կողմի դրամահավաքի ու լոգոյի մասին
Ի դեպԻ դեպ, ապրիլի 5-ին Հայաստանում նախանշված հանրաքվեի քարոզարշավը, կարելի է ասել, մտնում է ակտիվ գործնական փուլ։ Երկուշաբթի օրվանից ականատեսը կլինենք դասական իմաստով քարոզարշավի՝ այցելություններ քաղաքներ ու գյուղեր, հանդիպումներ, հանրահավաքներ, կոչեր, խոստումներ, թամաշա։ Սա՝ երկուշաբթի օրվանից, իսկ նախօրեին տեղի ունեցավ «Այո» քարոզչական կողմի իրականացրած դրամահավաք-երեկոն, որի ընթացքում հավաքվեց 205 մլն 560 հազար դրամ։ Երեկոյին մասնակցում էին ոչ միայն ՔՊ կուսակցության անդամները, այլեւ հրավիրյալներ, ովքեր կկարողանային գումար հանգանակել։ Նրանց մեջ մեզ հայտնի գործարարներ ու օլիգարխներ չկային, ինչը չի նշանակում, որ նրանք այս հանգանակությանը բոլորովին մասնակցություն չունեին։ Ինչեւէ, առաջին հարցը, որ սկսեց ակտիվորեն քննարկվել համացանցում, այն էր, թե արդյոք 100 մլն-ից ավել հանգանակված գումարը պետք է փոխանցվի պետական բյուջե։
Բանն այն է, որ համաձայն քարոզչության ֆինանսավորման հիմնադրամում մուծումներ կատարելու գործող կարգի՝ Հիմնադրամի հաշվին կատարված մուծումների ընդհանուր գումարը չպետք է գերազանցի 100 մլն դրամը։ Ասել է, թե 100 միլիոնը գերազանցող գումարը պետք է կփոխանցվի պետական բյուջե։ Այս պնդմանը հետեւեց «Իմ քայլ» -ականների մեկնաբանությունը, թե դրամահավաքը ոչ թե նախընտրական հիմնադրամի համար էր, այլ կուսակցության ընթացիկ կարիքները սպասարկելու։ Նկատենք, ճիշտ այդպես էլ ձեւակերպված էր վարչապետի գրառման մեջ, սակայն ի տարբերություն վարչապետի գրառման, դրամահավաքի երեկոյի հրավիրատոմսերում ասվում է, որ «հանգանակված միջոցներն ուղղվելու են հանրաքվեի քարոզարշավին»: Սա իհարկե, լավ խաղաքարտ է ՈՉ-ի կողմի համար, եւ այս կողմից արդեն քաղաքական իշխանության ներկայացուցիչներին առաջարկում են պահպանել հանրության առջև ստանձնած հանձնառությունը և հանրաքվեն կարգավորող օրենսդրության տրամաբանությունը՝ ապահովելով օրենքով սահմանված 100 միլիոն դրամը գերազանցող գումարի փոխանցումը ՀՀ պետական բյուջե։
Սպասենք իշխող կուսակցության արձագանքին կամ գործողություններին։ Բայց սա միակ խնդիրը չէ, որ աղմուկ բարձրացրեց։ Մյուսը վերաբերում էր ԱՅՈ քարոզչական կողմի լոգոյին։ Երեկոյի ժամանակ հանդիսավոր պայմաններում հայտարարվեց լոգոյի մրցույթում հաղթողի անունը, հայտարարվեց, որ նա ստանում է սահմանված դրամական պարգեւը՝ 3 մլն դրամ, իսկ այսօր արդեն պարզվեց, որ այդ լոգոն այնքան էլ նոր չէ։ Օրիգինալը ստեղծվել է 1991թ-ին՝ Հայաստանի անկախության հանրաքվեի ժամանակ։ Այս մեկը 1991թ անկախության հանրաքվեի լոգոներից մեկի կրկնօրինակն է։ Համաձայնեք՝ շատ անհարմար բան ստացվեց։ Եվ հիմա «Իմ քայլում» քննարկում են՝ լոգոն «փոխել, թե՞ չփոխել, այս է այս է խնդիրը, որն է հոգեպես ավելի ազնիվ»։
