Ի դեպ ՀՀ եւ Արցախի ԱԽ ների առաջիկա համատեղ նիստի մասին
Ի դեպԻ դեպ, առաջիկա օրերին Ստեփանակերտում տեղի կունենա Հայաստանի եւ Արցախի անվտանգության խորհուրդների համատեղ նիստը, թվով երրորդը Հայաստանում տեղի ունեցած հեղափոխությունից հետո:Նկատենք, համատեղ նիստը անցկացվում է բավական հետաքրքիր ժամանակահատվածում՝ թե պատմական, թե ընթացիկ իրադարձությունների առումով։
Հիշեցնեմ, այսօր փետրվարի 20-նն է, ԼՂԻՄ Մարզխորհրդի արտահերթ ու պատմական նստաշրջանի օրը, երբ որոշում ընդունվեց դիմել Ադրբեջանի, Հայաստանի ու ԽՍՀՄ ԳԽ-ներին՝ ԼՂԻՄ-ն Ադրբեջանի կազմից դուրս բերելու և Հայաստանին միացնելու խնդրանքով։ 1988թ. փետրվարի 20-ի նստաշրջանն, ըստ էության, կանխորշեց Արցախի ազատագրական պայքարը:Ադրբեջանական կողմը մարզի` Հայաստանի հետ վերամիավորման որոշմանը պատասխանեց ագրեսիայով: Հակասությունները շուտով վերաճեցին բաց առճակատման, այնուհետև` տևական այրունահեղ պատերազմի:
1991թ. հռչակվեց Լեռնային Ղարաբաղի Հանրապետությունը, 1994թ. մայիսին զինադադարի պայմանագրով դադարեցվեցին ռազմական գործողությունները մի կողմից Հայաստանի և Լեռնային Ղարաբաղի, մյուս կողմից` Ադրբեջանի միջև:1992-ին ղարաբաղյան հակամարտության կարգավորման նպատակով ստեղծվեց ԵԱՀԿ Մինսկի խումբը, որի շրջանակում իրականացվում է ղարաբաղյան կարգավորմանն ուղղված բանակցային գործընթացը:
Այս տարիների ընթացքում փոխվել են երկրների ղեկավարները, Մինսկի խմբի համանախագահները, փոխվել են հակամարտության կարգավորման սկզբունքներն ու զանազան պլանները, հակամարտությունը չի կարգավորվել, ԼՂՀ ոչ մի բնակչի մտքով անգամ չի անցել, և չի էլ անցնում, որ հնարավոր է վերադառնալ Ադրբեջանի իրավասության տակ, բանակցությունները շարունակվում են։
Բանակցությունների վերջին ռաունդը Մյունխենն էր, որ նշանավորվեց երկու երկրների ղեկավարների բաց հանդիպումով, եւ որն ամփոփվեց ՀՀ վարչապետի առաջ քաշած «Մյունխենյան սկզբունքներով»։ Հայաստանի եւ Արցախի անվտանգության խորհուրդների համատեղ նիստին ընդառաջ պատմական ու ընթացիկ իրադարձությունների պատկերն ավելի կամբողջանա, եթե հաշվի առնենք, որ շատ շուտով, մարտի 31-ին Արցախում կայանալու են նախագահական ու խորհրդարանական ընտրություններ, որոնք առաջինն են Հայաստանում կայացած հեղափոխությունից հետո , խիստ մրցակցային պայմաններում, իսկ ընտրությունների արդյունքում ձեւավորված իշխանությանը սպասում է սերտ համագործակցություն Հայաստանի իշխանության հետ։
Չմոռանանք նաեւ բանակում վերջին շրջանում տեղի ունեցած ցավալի դեպքերը։Շատ հավանական է, որ վարչապետի՝ Արցախ կատարելիք այցի ժամանակ տեղի ունենան բարձրաստիճան զինվորականների նոր պաշտոնազրկումներ։Մի խոսքով, ԱԽ-ների համատեղ նիստը տեղի է ունենում շատ հետաքրքիր ժամանակահատվածում, խիստ հագեցած օրակարգով։ Սպասենք արդյունքներին։
