Ի դեպ. Ջիանի Բուքիքիոյի հայտարարության մասին

Ի դեպ, դեռ չէինք հասցրել «մարսել» ԵԽԽՎ համազեկուցողների հայտարարությունը Հայաստանում վարչապետի աշխատակազմի ու ՍԴ-ի նախագահի միջեւ առկա բարձր լարվածության ու մտահոգությունների մասին, դեռ չէինք հասցրել ստանալ իշխանության ու ընդդիմության գնահատականների «միջին թվաբանականը», վրա հասավ Վենետիկի հանձնաժողովի նախագահը։

Ջիանի Բուքիքիոն Հայաստանի Սահմանադրական դատարանի շուրջ ստեղծված իրավիճակի վերաբերյալ հանդես է եկել նոր հայտարարությամբ՝ դարձյալ կոչ անելով բոլոր կողմերին զսպվածություն ցուցաբերել և թուլացնել լարվածությունը՝ հանուն Սահմանադրության բնականոն աշխատանքի:

Մեջբերում. «Ի հաջորդիվ 2019թ. հոկտեմբերի 29-ի հայտարարության՝ ես մտահոգված եմ մնում Հայաստանի Սահմանադրական դատարանի մասնակցությամբ ակնհայտ վեճի կապակցությամբ: Ես կիսում եմ ԵԽԽՎ համազեկուցողների մտահոգություններն այս կապակցությամբ: Ցանկանում եմ հիշեցնել 2019թ. հոկտեմբերին Վենետիկի հանձնաժողովի կողմից արված առաջարկներն առ այն, որ Սահմանադրական դատարանում վաղ թոշակի անցնելու ցանկացած սխեմա պետք է մնա իսկապես կամավոր, բացառի ցանկացած անհարկի քաղաքական կամ անձնական ճնշում ներգրավված դատավորների վրա և պետք է այնպես կառուցվի, որպեսզի ազդեցություն չունենա ընթացիկ գործերի ելքի վրա: Հայտարարության մեջ ասվում է նաեւ, որ վերջին հանրային հայտարարություններն ու գործողությունները չեն համապատասխանում այս չափանիշներին և նպաստավոր չեն լինի իրավիճակի թուլացման համար: Ակնհայտ է, որ հայտարորությունն ավելի շատ ու ավելի շուտ ուղղված է իշխանություններին։ Այլ հարց է, թե ինչպիսին կլինի արձագանքը։

Ընդդիմության համար սա հրաշալի առիթ է քննադատելու իշխանությանը, պնդելու, որ իշխանությունը պարզապես չի հասկանում, թե Վենետիկի հանձնաժողովի կարծիքը հաշվի չառնելու դեպքում ինչպիսի հետեւանքներ կարող են լինել, եւ որ սա նաեւ քաղաքական ոչ բավարար հասունության հետեւանք է։ Իշխանությունն իր լեգիտիմության բարձր դիրքերից կարող է պնդել, որեւէ դարակազմիկ ու ապոկալիպտիկ բան չի պատահել, որ իշխանությունն առաջին հերթին պատասխանատու է ժողովրդի առջեւ, հետո նոր միայն ի գիտություն ընդունել եվրոպական կառույցների խորհրդատվական կարծիքները։ Բայց հարցը միայն հրապարակային հայտարարությունները չեն։

Ավելի կարեւոր է, թե ինչպիսի գործողություններ կհետեւեն, այս հայտարարություններին։ Արդյոք իշխանությունը, ի գիտություն ընդունելով Վենետիկի հանձնաժողովի հայտարարությունը, կխմբագրի իր քայլերը, թե կշարունակի գործել նույն տրամաբանությամբ։ Դա կերեւա շատ շուտով, երբ ԱԺ-ի քննարկմանը կներկայացվի օրենսդրական նոր նախաձեռնությունը՝ «Ազգային ժողովի կանոնակարգ», «Հանրաքվեի մասին» եւ «Սահմանադրական դատարանի մասին» սահմանադրական օրենքներում փոփոխություններ ու լրացումներ կատարելու մասին։