Ի դեպ. Հայաստանի եւ Ադրբեջանի ԱԳ նախարարների հանդիպման մասին

Ի դեպ, Հայաստանի եւ Ադրբեջանի ԱԳ նախարարների դեռ չավարտված հանդիպումը Ժնեւում, արդեն իսկ կարելի է համարել աննախադեպ։ Աննախադեպ՝ հենց թեկուզ հանդիպման տեւողության առումով։ Հիշեցնեմ, այդ հանդիպումը մեկնարկել է նախօրեին, տեւել է շուրջ 7 ժամ, չի ավարտվել եւ շարունակվել է այօր։ Ու քանի դեռ չի հրապարակվել ամփոփիչ հայտարարությունը, դժվար է խոսել կոնկրետ արդյունքների մասին։ Փոխարենը, հաշվի առնելով նախընթաց զարգացումներն ու հայտարարությունները, հնարավոր է միայն ենթադրել, թե որոնք էին այն կարեւոր հարցերը, որոնց քննարկման համար ԱԳ նախարարներից այսքան երկար ժամանակ է պահանջվել։ Դրանցից մեկն հավանաբար ԵԱՀԿ Մինսկի խմբի համանախագահների կողմից մշտապես առաջ քաշվող սկզբունքներն ու տարրերն են։ Հիշեցնեմ, այս մասին խոսել էր Հայաստանի վարչապետը դեռ անցած տարի մարտին, Հայաստանի և Արցախի Անվտանգության խորհուրդների Ստեփանակերտում կայացած համատեղ նիստի ժամանակ։

Նա ասել էր, թե սա իսկապես կարևորագույն հարց է, բայց այս հարցին ի պատասխան մենք կարևոր պարզաբանումների կարիք ունենք: Իսկ ի՞նչ կարող են նշանակել այդ սկզբունքները գործնականում, և ո՞ւմն է դրանք մեկնաբանելու իրավունքը: Սա կարևոր է, որովհետև այն, ինչպես այդ սկզբունքները մեկնաբանում է Ադրբեջանը, մեզ համար անընդունելի է: Մենք, իհարկե, կարող ենք հանդես գալ այդ սկզբունքների սեփական մեկնաբանությամբ, բայց դա անիմաստ է, որովհետև մեր նպատակը ոչ թե լեզվակռիվն է, այլ արդյունավետ բանակցային գործընթացը:

Եվ հետևաբար, բանակցային գործընթացի հիմք պետք է դառնան տարընթերցումների տեղիք չտվող արձանագրումները: Բայց համանախագահների կողմից առաջարկված սկզբունքները, տարրերը, վերջին 10 տարիներին ամենատարբեր և ամենատարածական մեկնաբանությունների տեղիք են տվել, և հետևաբար, առաջիկա բանակցային գործընթացի կարևորագույն նպատակը պետք է լինի այսպես ասած հիմնական հասկացությունների՝ 3 սկզբունքների և 6 տարրերի պարզաբանումը, և մենք պատրաստ ենք նաև այսպիսի խոսակցության»։ Սա մեջբերման ավարտն էր։ Պիտի ենթադրել, ԱԳ նախարարների հանդիպման տեւողությունը կարող է պայմանավորված լինել հենց այս հստակեցումներով՝ հակամարտության կարգավորման սկզբունքների և տարրերի վերաբերյալ ունենալ տարընթերցումների տեղիք չտվող արձանագրումներ։ Սպասենք ԵԱՀԿ Մինսկի խմբի համանախագահների ամփոփիչ հայտարարությանը։