Առաջին հիասթափությունս եղավ այս տարի` 2019-ին. Անի Սամսոնյանի «Առաջին անգամ»-ը

ArmDaily.am-ը «Առաջին անգամ»-ի շրջանակներում զրուցել է ԱԺ պատգամավոր Անի Սամսոնյանի հետ:

-Առաջին հարցազրույցը
Առաջին հարցազրույցս եղել է 8-րդ դասարանում, երբ անդամակցում էի «Իրավաբանների և հոգեբանների ասոցիացիա» ՀԿ-ի «Պատանի իրավապահ» ակումբին և մեզ հյուրընկալել էին Հանրային հեռուստաընկերություն, որպեսզի մենք ներկայացնենք մեր աշխատանքները։

- Առաջին աշխատավարձը 

Առաջին աշխատավարձս վաստակել եմ երկրորդ կուրսում, երբ սովորում էի ՀՊՄՀ-ի Կուլտուրայի ֆակուլտետի Լրագրության բաժնում։ Ինձ առաջարկեցին աշխատել գովազդային գործակալ կաբելային վճարովի հիմունքներով ալիքներ առաջարկող մի կազմակերպությունում։ Դա գործում էր Նոր-Նորքի զանգվածում։ Դասերից հետո կուրսընկերուհուս հետ շրջում էինք շենքերով և առաջարկում այդ ծառայությունները։ Իհարկե վաստակում էինք այնքան, որքան կնքում էին պայմանագրեր։

- Առաջին պաշտոնը
Առաջին պաշտոնս եղել է Երևանի ավագանու անդամությունը 2017-ին։

-Առաջին անգամ սիրահարվելը
Առաջին անգամ սիրահարվել եմ 13 տարեկանում։ Հասկացա, երբ Սուրբ Վալենտինի օրը դպրոցի միջանցքում մի սիրային նամակ ստացա։ Հետո որպեսզի այն ծնողներս չհայտնաբերեն՝ ստիպված այրեցի։

-Առաջին հիասթափությունը
Առաջին հիասթափությունս եղավ այս տարի` 2019-ին։ Չեմ մանրամասնի։

- Առաջին անգամ համբուրվելը
Առաջին անգամ համբուրվել եմ, երբ նոր ավարտել էի դպրոցս: Շատ պատահական ստացվեց։ Չէի պլանավորել։ Հետո երկար ժամանակ նախատել եմ ինձ, որովհետև միշտ մտածել եմ, որ ինչ-որ մեկին համբուրելու համար պիտի անպայման սեր լինի։

- Առաջին ապտակը ստանալը կամ առաջին անգամ ապտակելը։
Առաջին անգամ ինձ ապտակել են յոթ տարեկանում, երբ Ռուսաստանում շատ կարճ ժամանակով դպրոց հաճախեցի։ Մաթեմատիկայի ուսուցիչը հանձնարարել էր նկարել երկրաչափական պատկերներ։ Ես կատարել էի հանձնարարությունս, բայց նաև գունավորել էի դրանք։ Հանձնարարությունը շարքերով ստուգելիս նա հասավ ինձ, ուսումնասիրեց տետրս և ապտակեց։

- Առաջին անգամ կաշառելը եւ կաշառվելը
Երեխա ժամանակ խանութ ուղարկելու համար հայրս ստիպված միշտ պաղպաղակի համար գումար պիտի տար։

- Առաջին անգամ գողանալը
Հիշում եմ երեխա էի, երբ մեր բարեկամներից մեկի տանը Kinder-ի խաղալիք տեսա։ Այն ինձ շատ դուր եկավ և ես վերցրի ինձ հետ։ Հետո մեծ քույրս տանը տեսավ, որ ես դա ինձ հետ բերել եմ, նախատեց և ասաց, որ այլևս առանց զգուշացնելու որևէ մեկի խաղալիքը չվերցնեմ։ Խաղալիքը հետ վերադարձրի։

-Առաջին ճանփորդությունը
Առաջին ճամփորդությունս եղել է դեպի Արցախ։ Ես դպրոցական էի։ Մի օր ծնողներիս ասացի, որ ես պիտի գնամ Արցախ և դուք ինձ չեք կարող արգելել։ Մի կազմակերպություն կար, որ մեկնում էր։ Ես միացա նրանց և գնացի։ Դա իմ ամենատպավորիչ և հուզառատ ճամփորդությունն էր։

Դուսյա Ղազարյան