Ի դեպ. Պետական պաշտպանության ենթակա անձանց ու վարչապետի դստեր ամենագնացի մասին

Ի դեպ, արդեն 2-3 օր է, համացանցում շարջանառվում,հոլովվում, եփվում է մի թեմա՝ կապված վարչապետի դստեր համար ամենագնաց մեքենա ձեռք բերելու հետ։ Հրապարակումներն այն մասին էին, որ պետության հաշվին շռայլ ծախս է արվել հանուն վարչապետի դստեր, ՊՊԾ միջոցներով Մարիամ Փաշինյանի համար գնվել է 2019 թվականի արտադրության Nissan մակնիշի ամենագնաց։ Ասում էին, նույնիսկ, թե մեքենան վարչապետի դստեր ընտրությամբ է գնվել սրահից, և պետությունը դրա համար ծախսել է ավելի քան 27 հազար դոլար։ Հետո նախ «փաստերի ստուգման հարթակը» իրազեկեց, որ մեքենան ոչ թե 2019, այլ 2018թ-ի արտադրության է, հետո վարչապետի դուստրը հայտնեց, որ ինքը մեքենա չի ընտրել, եւ որ իր համար տարբերություն չկա, թե ինչ մեքենա կօգտագործվի անվտանգության նկատառումներից ելնելով։

Բայց սրանով թեման չփակվեց, այլ շարունակվեց այլեւայլ նրբություններով ու մանրամասներով։ Այսօր արդեն իր ավանդական «Զրույց քաղաղացու հԵտ» ձեւաչափով խնդրին անդրադարձավ վարչապետ Նիկոլ Փաշինյանը։ Նա մանրամասն բացատրեց, որ իր աղջկա համար մեքենա չի գնվել, որ այն ձեռք է բերել ՊՊԾ-ը՝ իր գործառույթներն իրականացնելու համար, այն է՝ ապահովել հատուկ պետական պահպանության ենթական անձանց անվտանգությունը։

Պետական պահպանության ենթակա անձ է ոչ միայն վարչապետը, այլեւ նրա ընտանիքի անդամները եւ նրանք իրավունք չունեն հրաժարվել այդ ծառայությունից։ Խոսքը «Հատուկ պետական պաշտպանության ենթակա անձանց անվտանգության ապահովման» օրենքի մասին է։ Կարծես սովորել էինք, որ նման իրավիճակներում, երբ պետական համակարգը չի ուզում կամ չի կարողանում մի հոդաբաշխ բացատրություն տալ, թե ինչն ինչոց է ու որը որից հետո է՝ արդի հայերենով ասած, հայտնվում էր վարչապետն ու ասենք այսպես՝ հանգցնում էր կրակը։

Այս անգամ էլ նա փորձեց նույնն անել, բայց, դժվար է պնդել, թե դա նրան հաջողվեց։ Խոսքը ոչ միայն գրված, այլեւ չգրված օրենքների ու հեղափոխության առաջնորդի, նրա կերպարի մասին հանրային պատկերացումներից շեղվելու մասին է։ Իսկ այդ պատկերացումներով՝ վարչապետը դեմ է «պադավատապետությանը»։ ՄԻ պատմություն հիշեցի. 90-ականների սկզբին իշխանությունից հեռացած կոմունիստը հարցնում է իշխանության եկած ՀՀՇ-ականին, թե որտեղից այդ թանկանոց մեքենան ու կոստյումը, սա պատասխանում է, թե մեքենան պետությունն է տրամադրել, կոստյումն էլ նվիրել են։ Կոմունիստն ասում է՝ բա հեր օրհնած, մեզ էլ էին ճիշտ այդպես՝ նվիրում ու տրամադրում։