Ի դեպ. ադրբեջանական «հեղափոխության» մասին
Ի դեպԻ դեպ. Ադրբեջանի խորհրդարանը ինքնալուծարվում է: Խորհրդարանը արձակելու և վաղաժամ ընտրություններ անցկացնելու՝ իշխող կուսակցության դիմումը, ուղղված երկրի նախագահին, Ադրբեջանի օրենսդիր մարմինն ընդունել է ձայների բացարձակ մեծամասնությամբ:
99 պատգամավոր կողմ է քվեարկել, մեկը դեմ, մեկը ձեռնպահ: Որոշումը հիմնավորվում է նրանով, թե գործող խորհրդարանը չի համապատասխանում երկրի ղեկավարի վարած քաղաքականությանը և փաստացի դուրս է մնում երկրում կատարվող բարեփոխումներից: Իրականում ինչ է կատարվում Ադրբեջանում: Ակնհայտ է, որ իշխանության ղեկը այդ երկրում փոխանցվելու է Մեհրիբան Ալիեւային եւ երկրի առաջին տիկինն ու առաջին փոխնախագահը դառնալու է առաջին դեմքը եւ այս գործընթացը պետք է դիտարկել հենց այդ համատեքստում:
Պատահական չէր որ խորհրդարանի արձակմանը նախորդել էր Ալիեւայի այցը Մոսկվա, որտեղ նա արժանացավ երկրի առաջին դեմքին վայել ընդունելության ամենաբարձր մակարդակով, խոսեց միջազգային, արտաքին քաղաքական թեմաներով: Սա ըստ էության գլխավոր փորձն էր քաղաքական ներկայացման պրեմիերիայից առաջ եւ ուշագրավ է, որ այն տեղի ունեցավ Մոսկվայում, այլ ոչ ավագ եղբոր մոտ՝ Թուրքիայում:Եւրոպայի մասին էլ չենք խոսում՝ գործող նախագահի խոսքերով Ադրբեջանը դեմ է եվրաինտեգրացմանը, քանի որ իրենք ավանդական արժեքներով են ապրում: Հաջորդը:
Ադրբեջանում ինչ-որ կերպ փորձում են հակակշիռ ստեղծել հայկական հեղափոխությանը: Հայաստանում տեղի ունեցած հեղափոխությունից հետո ամբողջ աշխարհն էր խոսում, որ Հայաստանն այլեւս ժողովրդավարական երկիր է դառնում: Եւ ահա, Իլհամ Ալիեւը, ինչպես նկատեց փորձագետներից մեկը, Ադրբեջանում հեղափոխություն է անում՝ ինքնություն ու վերեւից: Սա ենթադրում է ոչ միայն խորհրդարանի արձակում, այլեւ փոփոխություններ ամբողջ իշխանական համակարգում ու կլանների ազդեցության դաշտում:
Եւ՝ մեզ համար ամենակարեւորը. Արդյոք այս փոփոխությունները կարող են ինչ որ մեղմացումներ բերել ղարաբաղյան հարցում Ադրբեջանական կողմի դիրքորոշման ու մոտեցումների մեջ: Իհարկե՝ ոչ: Ոչ նոր խորհրդարանից, որ հավանաբար կազմված կլինի երիտասարդ կադրերով, ոչ էլ ապագա առաջին դեմքից մեղմացումներ սպասել պետք չէ: Նրանք տարիներով հակահայ քարոզչության մեջ են ապրել, իսկ Մեհրիբանի երազանքը եղել ու մնալու է Արցախում մուղամ լսելը: Իսկ առաջիկա ընտրությունների համատեքստում Արցախի թեմայի շահարկման պակաս Ադրբեջանում հաստատ չի լինելու:
