Ի դեպ. Մեծի Տանն Կիլիկիո կաթողիկոսի եւ ԱԱԾ նախկին ղեկավարի գրառումների մասին
Ի դեպԻ դեպ, նախօրեին բավական մեծ հետաքրքրություն առաջացրեց Մեծի Տանն Կիլիկիո Արամ Առաջին կաթողիկոսի մի գրառումը Թվիթերում։ Նա գրել է, թե «հեղափոխությունն արագ հօդս է ցնդում, երբ խոստումը հեռու է մնում իրականությունից»։ «Հեղափոխությունն արագ շոգիանում է, երբ խոստումը նրա հենարանը չէ։ Ու երբ խոստումը հեռու է մնում կյանքի իրականությունից, մի խոր անջրպետ է գոյանում ժողովրդի ու իշխանության միջև. կացություն, որն աննախատեսելի վտանգներով հղի է դառնում»։ Արամ Առաջինն այս գրառումով ըստ էության արձանագրում է, որ դժգոհ է հետհեղափոխական զարգացումներից եւ գործող իշխանության գործելաոճից։ Ի դեպ, բավական ուշագրավ է Արամ Առաջինի հռետորաբանության շեշտադրումների փոփոխությունը հեղափոխությունից հետո, այս մեկուկես տարվա ընթացքում։ Սկզբնական շրջանում նա ասում էր, թե Հայաստանում,մեջբերում եմ՝ «սիրո և համերաշխության նոր էջ բացվեց, և ես վստահ եմ, որ այս սիրո ու համերաշխության էջը նաև պիտի դառնա ազգային միասնականության էջ, մեր ժողովրդի բոլոր զավակների ամբողջական հանձնառությամբ ու մասնակցությամբ Հայաստանի վերաշինության սրբազան առաքելության»։ Ավելին, նա վարչապետին հավաստիացնում էր, որ Կիլիկիո աթոռն իր թևերով, և ինքն անձնապես ամբողջական իմաստով նեցուկ է լինելու վարչապետին, որովհետև նրա հաջողությունը Հայաստանի հաջողությունն է։ Այս մասին նա ասել է հոկտեմբերին, իր ձեռնադրման 50 ամյակին նվիրված արարողության ժամանակ։ Հետո Վեհափառի խոսքում շեշտադրումների աստիճանական փոփոխություն նկատվեց, նախ Հայաստանի անկախության տոնի առթով շնորհավորական ուղերձում խոսում էր ներքին բեւեռացումներ ու լարվածություն առաջացնող քայլերից զերծ մնալու անհրաժեշտության մասին, չհստակեցնելով ուղերձի հասեատիրոջը, իսկ հիմա արդեն խոսում է խոստումների ու իրականության հեռավորության մասին։ Կարելի էր այստեղ բազմակետ դնել ու խորհել Վեհափառի մտահոգությունների պատճառների մասին։
Սակայն նրա այս գրառումը շարունակություն ունեցավ, այս անգամ արդեն ԱԱԾ նախկին ղեկավարի ինստագրամյան էջում։ Վանեցյանը լուսանկար է հրապարակել Մեծի Տան Կիլիկիո կաթողիկոս Արամ Առաջինի հետ ու գրել է. «Եթե հեղափոխությունն այդ հակազդեցությունից և հաստատումից բացի, ժողովրդի կյանքը հեղափոխող գործոն չի դառնալու, ապա այն սոսկ դատարկ մի պղպջակ է»: Այն, որ պաշտոնաթողությունից հետո Արթուր Վանեցյանը քաղաքական հավակնություններ է դրսեւորելու, պարզ էր դեռ իր հրաժարականի տեքստից։ Բայց որ այդ հավակնությունների դրսեւորման ու իրագործման գործին կամա, թե ակամա մասնակից է դառնալու նաեւ հոգեւոր առաջնորդը, անսպասելի էր ու բավական ուշագրավ։ Հետաքրքիր է, թե ով է հրապարակելու հաջորդ նկարը Վեհափառի հետ, ով է լինելու հաջորդ գրառման հեղինակը։ Գործընթացը մեկնարկել է, շարունակությունը՝ հաջորդիվ։
