Ես ընկերներ ձեռք չեմ բերել, որ հիասթափվեմ. Բլից հարցազրույց դատավոր Գոռ Թորոսյանի հետ

Վազող տող 19 Նոյեմբեր, 2019 12:30

ArmDaily.am-ը «Խորհրդակցական սենյակում» շարքի շրջանակներում շարունակում է բացահայտել դատավորներին։ Այս անգամ մեր բլից հարցերին պատասխանել է Երևան քաղաքի ընդհանուր իրավասության դատարանի դատավոր Գոռ Թորոսյանը։

Նայեք հայելու մեջ: Ո՞ւմ եք տեսնում այնտեղ:
- Տեսնում եմ ինձ, բայց հայելու մեջ:

Որպես անհատականություն` ե՞րբ եք կայացել:
-Երբ առաջին դասարանում ոչ ոք ինձ չէր ցանկանում ընդունել իր դասարան:

Ի՞նչ հատկանիշներ կցանկանայիք ունենալ, որ չունեք:
-Այն հատկանիշները, որը չունեմ, չէի ցանկանա ունենալ, այլապես երևի կունենայի:

Ի՞նչ հատկանիշներից կցանկանայիք ձերբազատվել:
-Ուշանալու հատկանիշի որոշ դետալներից:

Եթե նորից ծնվեիք...ի՞նչ կփոխեիք ձեր կյանքում:
-Բնակությանս հասցեն:

Ինչպիսի՞ մանուկ էիք, մի հետաքրքիր դրվագ կպատմե՞ք, ցանկալի է` հումորային: -Եղել եմ անցումային շրջանի մանուկ, հետաքրքիր և հումորով լի մանկությամբ, բայց կոնկրետ դրվագ չեմ մտաբերում:

Ինչի՞ համար եք զղջում:
-Զղջում եմ, որ չի ստացվում ...:

Ինչպե՞ս դարձաք դատավոր ընդամենը 29 տարեկանում։
-Օրենքով սահմանված կարգով:

Ինչո՞ւմ եք ամենաշատը Ձեզ մեղադրում:
-Մեղադրում եմ, որ գիրք քիչ եմ կարդում:

Ի՞նչ ստեր եք հաճախակի ստիպված ասել, բացի «10 րոպեիս կհասնեմ»։
-Կհասնեմ 15 րոպեից:

Ձեր հաջողության հասնելու գաղտնիքը ո՞րն է: Բացի Աստծուց եւ ընտանիքից` էլ ո՞ւմ եք շնորհակալ:
-Հայ ժողովրդին և Հայաստանի Հանրապետությանը:

Ինքներդ Ձեզնից գո՞հ եք, եթե այո, ապա ինչպե՞ս է հաջողվել գոհ լինել, եթե ոչ, ապա դժգոհությունը ի՞նչ հարցերի շուրջ է:
-Գոհ եմ այն ժամանակ, երբ արել եմ անել այն, ինչ կարող էի, դժգոհ եմ, երբ պետք է անեի այն, ինչ կարող էի, բայց չեմ արել:

Ովքե՞ր (ինչեր) են Ձեր թշնամիները, հակառակորդները եւ աջակիցները:
-Ես:

Ֆոբիաներ ունե՞ք։
-Ունեմ մտահոգություններ:

Վիսկի, թե թթի օղի։
-Հայկական խնձորի հյութ:

Ի՞նչ կենացներ եք խմում։
-Խմում եմ նախավերջին և վերջին կենացները:

Սիրելի ուտեստ եւ ուտեստ, որը կարողանում եք պատրաստել։
-Սիրելի է այն ուտեստը, որն արդեն պատրաստ է:

Հայաստանում ի՞նչն է ամենից շատ Ձեզ նյարդայնացնում:
-Ոչինչ:

Ամենամեծ նյութական հարստությունը, որ ունեք: Չասեք, թե ձեր համար կարեւորը հոգեւոր հարստությունն է:
-Իմ ունեցած նյութական հարստություններն ամենամեծը չեն:

Ամենառոմանտիկ օրը:
- Դեկտեմբերի 14: Այդպես ճիշտ է:

Անցած սերեր։
- Բայց ինչու անցած և ինչու (եր):

Ինչի՞ եք պատրաստ հանուն սիրո։
-Բանականության:

Եթե Հայաստանում բազմակնություն լիներ, քանի՞ կին կպահեիք:
-Ոչ մի:

Ձեր սիրտ տանող ճանապարհը ե՞ւս ստամոքսով է։
-Ոչ միայն:

Հայոց պատմության ամոթալի դրվագը։
-Հայոց պատմության ամոթալի դրվագները հայոց պատմության մեջ չեն:

Քանի լեզու գիտեք։
-Հայերեն, և հայերենի հետ կապված ևս երկու լեզու:

Բարեվարքության կանոնների նախագծի ո՞ր կետին եք դեմ։
-Ոչ մեկին:

Ինչքա՞ն գումար կարող եք ծախսել մեկ օրվա ընթացքում։
-Իսկ ինչքա՞ն գումար ունեմ:

Պարտքով փող տալի՞ս եք, իսկ վերցնո՞ւմ եք։
-Ոչ:

Ընկեր, որից հիասթափվել եք։
-Ես ընկերներ ձեռք չեմ բերել, որ հիասթափվեմ:

Խաղադրույք անել, խաղատուն գնալ, թե բլոտ խաղալ...որտե՞ղ եք անպարտելի։
-Գործի բերումով ոլորտը կարգավորող օրենսդրության իմացության:

Մոլախաղում հաղթած ամենամեծ եւ փոքր գումարը։
-0 ՀՀ դրամ, գումարած ՀՀ քաղաքացիական օրենսգրքի 411-րդ հոդվածով նախատեսված տոկոսներ:

Եթե ոչ դատավոր, ապա...։
-... ավելին:

Խորհրդակցական սենյակում։
-Մենակ ես, բայց մտքերն են շատ:

Ասֆալտին փռվել, պատերին ծեփվել, թե հանգիստ նստել տեղները...ո՞րն է նախընտրելի։
-Աշխատելը:

Ամուսնանում են, որովհետեւ սիրում են, թե սիրում են, քանի որ ամուսնացել են...։
-Ամուսնանում են, որովհետև այդպես պետք է սերն արտահայտել:

Բարսելոնա, թե Ռեալ-Մադրիդ...սիրելի ֆուտբոլիստը։
-Անունը չեմ հիշում:

Սիրելի հավաքականի խաղին հետեւելիս ձեր գործողությունները...եղուգներն եք կրծում, բազմոցի վրա թռչկոտում, ափսեներ ջարդում, գոռգռում, թե...։
-Գիրք եմ կարդում:

Հարց շարքի հաջորդ մասնակցին։
-Դուք էլ զանգերին չեք պատասխանում։