Համատեղ հանրահավաք՝ Նիկոլ Փաշինյանի դեմ, թե միմյանց դեմ

Երեկ ընդդիմադիր առաջնորդների մասին մի նյութ էի հրապարակել, ընդամենը հանրահավաքին մասնակցել-չմասնակցելու դրվագով ցույց տալով, թե ինչ սխալ հաշվարկներ են նրանք անում, ինչ չհաշվարկված ամբիցիաներ ունեն։
Հանրահավաքն արդեն անցյալում է, բայց առաջնորդ ունենալու, միասնականության մասին խոհերը շարունակում են տանջել մեզ՝ իբրեւ հանրություն։
Հիմա երեկվա հանրահավաքին երրորդ նախագահը մասնակցում էր, իսկ երկրորդ նախագահը չէր մասնակցում առողջական խնդիրների պատճառով։ Այն, որ Քոչարյանի եւ Սարգսյանի ջրերը մի առվով չեն հոսում տեւական ժամանակ՝ գաղտնիք չէ, հրապարակային միմյանց «կծմծում են», ակնարկներ, մեսիջներ ուղարկում։ Չի բացառվում, որ նրանք երբեք էլ չկարողանան միմյանց հետ կանգնել նույն հարթակում եւ պայքարել։

Փոքր, աննշան թվացող «նյուանս» կարող է լինել, բայց մեր աչքից չվրիպեց այն, որ հանրահավաքի մասին «Հայաստան» դաշինքի, ապա Ռոբերտ Քոչարյանի էջում վերահրապարակված 53 լուսանկարի մեջ որեւէ լուսանկարում չկա Սերժ Սարգսյանը։ Մինչդեռ Սերժ Սարգսյանը հանրահավաքի շարքային մասնակից չէ, երրորդ նախագահ, քաղաքական, պետական գործիչ, հանրահավաքը կազմակերպող ուժի առաջնորդ...։ Այսինքն՝ նույնիսկ այս օրհասական պահին, երբ ընդդիմադիր ուժերը նետվել են հրապարակ հայրենիքը փրկելու, չեն կարողանում հաղթահարել միմյանց նկատմամբ հակակրանքը։ Մեկ-երկու լուսանկար Սերժ Սարգսյանի մասնակցությամբ հաստատապես չէր նսեմացնի «Հայաստան» դաշինքին եւ նրա առաջնորդին։ Հիմա հարց է առաջանում՝ այսպես դուրս եք եկել հրապարակ Նիկոլ Փաշինյանի դեմ պայքարելո՞ւ, թե՞ միմյանց, միթե պարզ չէ՞, որ այսպիսի քինախնդրությամբ, միմյանց նախանձելով, հակակրելով կարող են ընդհանուր գործ նախաձեռնել եւ իրականացնել։ «Հայաստան» դաշինքի էջում տեղ գտած լուսանկարներում դաշինքի անդամների լուսանկարներն են, ելույթ ունեցողներ, ժողովուրդ, այսինքն ոչ մի կադրում Սերժ Սարգսյանը չկար։

Ի դեպ, նույն հատընտիր ֆոտոշարքն էլ «Հանրապետական» կուսակցության էջում է տեղ գտել, իհարկե, գուցե նրանք տեսել են ընդդիմադիր գործընկերոջ տեղադրած լուսանկարները եւ որոշել են իրենք էլ արհամարհել պայքարի իրենց ընկերոջը...։ Քավ լիցի, դիմացինի վատ արարքը ամենեւին էլ արդարացում չէ, քանի աստիճան ՀՀԿ-ն կբարձրանար մեր աչքին, եթե տեսնեինք նրանց էջի ֆոտոշարքում «Հայաստան» դաշինքի անդամներին։

Ու այս հակասությունը միայն լուսանկարների կռիվ չէ, լավատեղյակները պնդում են, որ նաեւ «միկռաֆոն» խլելու պահեր են եղել, հրահանգներ երիտթեւերին՝ սրա ելույթի ժամանակ ծափ չտաք, մեր կուսակցության ղեկավարի խոսելու ժամանակ բարձր ծափ կտաք եւ այլն։
Այս նախանձելի «միասնականությամբ» մեր ընդդիմությանը հաստատ կհաջողվի Նիկոլ Փաշինյանին հեռացնել, հայրենիքն էլ փրկել։