Չինարի գյուղի դիրքերում փոխհրաձգություն է տեղի ունեցել. մանրամասնում է համայնքի ղեկավարը
Արցախ եւ մարզեր
Հայ-ադրբեջանական սահմանին երեկ փոխհրաձգություն է տեղի ունեցել։ Այս մասին հայտարարել էր Ադրբեջանի պաշտպանության նախարարությունը։ Ըստ տարածվող լուրերի դեպքը տեղի է ունեցել Տավուշի մարզում Չինարի գյուղի դիրքերում։
ArmDaily.am-ը կապ հաստատեց գյուղապետ Սամվել Սաղոյանի հետ, ով մեզ հետ զրույցում հաստատեց լուրը։
Գյուղապետի վկայությամբ դեպքը տեղի է ունեցել երեկ երեկոյան։
«Ով ա Ձեզ ասել էդ լուրը, հա եղել ա կրակոցներ, երեկ երեկոյան ա տեղի ունեցել, տուժածներ չկան»,-ArmDaily.am-ի հետ զրույցում ասաց գյուղապետը։
Հարցին, թե բնակիչների շրջանում խուճապ կա՞, պատասխանեց. «Ոչ, չինարցին միշտ ամուր կանգնած ա էս հողում, սա մեզ համար ինչ ա որ, մի երկու հատ հրազենային կրակոց ա էլի»։
Կրակոցները լսվել են նաև հարևան գյուղերում։ Այգեձորի բնակիչներից մեկը մեզ հետ զրույցում ասաց, որ կրակոցները, ճիշտ է. Չինարիում են եղել, բայց մինչև իրենց գյուղ փոխհրաձգության ձայները լսելի են եղել։ Այս գյուղում ևս խուճապ չկա, տուժածներ ևս։
«Հա լսվել են, բայց նորմալ ա, բան չկա»,-ասաց Այգեձորի բնակիչը։
Այս պահին երկու գյուղում էլ իրավիճակը խաղաղ է։
Սեդա Մակարյան
