Երկար-բարակ շնորհավորանքների եւ ամփոփումների փոխարեն
Խմբագրական
ArmDaily.am-ի սիրելի ընթերցողներ, հարգելի հետեւորդներ, եւս մեկ տարի մենք իրար հետ միասին ճանապարհ անցանք։ Նախ, ցանկանում ենք շնորհակալություն հայտնել մեր հավատարիմ, հին եւ նոր ընթերցողներին, ովքեր այս մեկ տարվա ընթացքում շարունակեցին հետեւել մեզ, կարդալ, դիտել, համաձայնել, վիճել, հիանալ եւ քննադատել։ Հավատացեք, ձեր կարծիքը անչափ կարեւոր է մեզ համար, իսկ քննադատությունները օգնում են կատարելագործել մեր աշխատանքը։
Ինչպես նախորդ տարիներին, այնպես էլ եկող տարի մենք փորձելու ենք առավելագույնը լինել օբյեկտիվ, ներկայացնել միայն ստույգ, ճշգրիտ տեղեկություն, բարձրացնել հասարակության հուզող հարցերը, մեծ պատվով եւ պատասխանատվությամբ կատարել մեդիայի առաքելությունը՝ փորձելով մեր համեստ ներդրումը ունենալ Հայաստանի առաջ ծառացած խնդիրների լուծմանը իրավական եւ ժողովրդավարական պետություն կառուցելու ճանապարհին։
Այս տարի եւս, ինչպես նախորդ տարի, Ամանորը դեռ ամբողջովին տոն չենք կարող համարել, ցավոք, մեր երկրի առաջ ծառացած անվտանգային սպառնալիքները թույլ չեն տալիս մոռանալ խնդիրները եւ լիաթոք վայելել տոնական օրերը։
Լիահույս ենք, որ արդեն հաջորդ տարի՝ 2022թ ամփոփելիս մեր խնդիրները շատ ավելի քիչ կլինեն, միտքը՝ ազատ, սիրտը՝ ուրախ եւ կկարողանանք լիաթոք վայելել Ամանորը՝ արդեն անցյալում թողնելով բոլոր դժվարությունները եւ սպառնալիքները։
Ուստի՝ կապույտ վագրի տարում մեզ բոլորիս՝ մեծից փոքր, ArmDaily.am-ը մաղթում է խաղաղություն եւ կայունություն։ Անվտանգ եւ բարեկեցիկ Հայաստանը բոլորիս երազանքն է եւ թող 2022թ բոլորիս ուժ, տոկունություն, շրջահայացություն, առողջություն եւ համբերություն պարգեւի՝ անանձնական եւ անձնական նպատակները եւ իղձերը իրականացնելու համար։
Շնորհավոր Ամանոր եւ Սուրբ ծնունդ, եղեք առողջ եւ երջանիկ, սիրելի ընթերցել։
Միշտ՝ Ձեր ArmDaily.am
