Ի դեպ. Ռոբերտ Քոչարյանի վերադարձի ու «Հայաստան» դաշինքի մասին
Ի դեպԻ դեպ, նախօրեին պաշտոնապես հայտարարվեց նախընտրական նոր դաշինքի մասին։ «Հայաստան» դաշինքի մաս են կազմում ՀՅԴ եւ «Վերածնվող Հայաստան» կուսակցություննները, նրանց նախընտրական ցուցակը կգլխավորի ՀՀ 2-րդ նախագահ Ռոբերտ Քոչարյանը։ Մեկ -երկու տարի առաջ դժվար էր պատկերացնել, որ Ռոբերտ Քոչարյանը ոչ միայն, ըստ էության, կարդարացվի իրեն ներկայացված՝ սահմանադրական կարգը տապալելու մեղադրանքից, կվերադառնա քաղաքականություն, ելույթ կունենա Ազատության հրապարակում եւ կհավակնի իշխանության։ Սա իհարկե առաջին դեպքը չէ, երբ երկրի նախկին ղեկավարը վերադառնում է, տարբեր պատճառներով ու մոտիվացիաներով։ Նման օրինակներ ունենք՝ սկսած դեռ Կարեն Դեմիրճյանից, հետո Լեւոն Տեր Պետրոսյան, հիմա Ռոբերտ Քոչարյան։
Սա՝ ի դեպ։ Ինչ վերաբերում է Ռոբերտ Քոչարյանի վերադարձին. Մեջբերում. «Ունեմ կառավարման մեծ փորձ ճգնաժամային իրավիճակներում, ունեմ կուտակած փորձ և գիտելիքներ անվտանգության, պաշտպանության համակարգում, ունեմ փորձ տնտեսական ճգնաժամ հաղթահարելու հարցում, և, ինչպես տեսնում եք, ներկա վտանգները և կուտակած փորձն ու գիտելիքները գրեթե համընկնում են»։ Իսկ ինչու ՀՅԴ եւ Վերածնվող Հայաստան։ Ռոբերտ Քոչարյանի մեկնաբանությամբ ՀՅԴ-ն այն կուսակցությունն է, որ աշխարհով մեկ պայքարել է և պայքարում է հայերի ինքնությունը պահպանելու համար, որի հետ ունի երկարատև համագործակցության փորձ, փորձն արդյունավետ է։ Ինչ վերաբերում է «Վերածնվող Հայաստան» կուսակցությանը, ապա այն ծնվել է Սյունիքում և հիմա տարածվում է Հայաստանի Հանրապետությունում մեկ, որովհետև Սյունիքն այսօր ներկա սպառնալիքների էպիկենտրոնն է ՀՀ-ի համար, Սյունիքից է կախված՝ մենք մնալո՞ւ ենք որպես գործոն այս տարածաշրջանում, թե՞ դառնալու ենք որպես կցորդ։
Սյունիքն՝ այսօր մեր այս պահի պայքարի սիմվոլն է»,–ասում է Ռոբերտ Քոչարյանը։ Ինչեւէ. Նկատենք, որ եւ գործող վարչապետ Նիկոլ Փաշինյանը, եւ նախկին նախագահ Ռոբերտ Քոչարյանը այս ընտրությունները դիտարկում են որպես վարչապետական ընտրություններ, իսկ հաղթանակը կամ պարտությունը չափազանց մեծ գին ունեն։ Արդյոք Ռոբերտ Քոչարյանի հաղթանակի դեպքում Նիկոլ Փաշինյանը պատրաստ է ընդունել արդյունքներն ու հանձնել իշխանությունը։ Կամ, արդյո՞ք Փաշինյանի հաղթանակի դեպքում Ռոբերտ Քոչարյանը պատրաստ է դառնալ «սովորական ընդդիմադիր» խմբակցություն ունենալ ԱԺ-ում ու լեգիտիմացնել գործող վարչապետի իշխանությունը։ խաղասեղանին շատ բան է դրված ու պայքարը շատ թեժ է լինելու։
