Ի դեպ. ՌԴ ԱԳ նախարար Սերգեյ Լավրովի տարածաշրջանային այցի մասին
Ի դեպԻ դեպ, այսօր մեկնարկեց ՌԴ ԱԳ նախարար Սերգեյ Լավրովի այցը տարածաշրջան։ Նա այսօր եւ վաղը կլինի Երեւանում, ապա կմեկնի Բաքու։ Ակնհայտ է, որ ռուսական դիվանագիտության ծանր հրետանու այցը ենթադրում է կարեւոր արձանագրումներ մի շարք առանցքային ու հարակից հարցերում։ Հատկանշական է, որ այցի նախօրեին ադրբեջանական կողմը վերադարձրեց 3 հայ ռազմագերի։ Սա խորհրդանշական քայլ էր, հաշվի առնելով որ գերիների հարցն հիմա ամենակարեւորն է Հայաստանի համար եւ այն կլինի ՌԴ ԱԳ նախարարի հետ քննարկումների օրակարգում։ Հաջորդը. Հիշեցնեմ, այս այցի մասին հայտնի դարձավ ՌԴ եւ Ֆրանսիայի նախագահների հեռախոսազրույցից հետո, երբ ԵԱՀԿ Մինսկի խմբի անդամ երկու երկրների նախագահները հայտարարեցին նոր նախաձեռնությունների մասին։ Ինչպիսի՞ նոր նախաձեռնությունների մասին է խոսքը։ Արդյոք Լավրովը գալիս է այդ նախաձեռնությունները առաջ մղելո՞ւ, թե՞ կողմերի դիրքորոշումները ճշտելու եւ ըստ այդմ որոշելու՝ առաջ մղել, թե արգելափակել։
Հաշվի առնենք, որ եթե պատերազմից առաջ ԵԱՀՄ Մինսկի խմբում կար կոնսենսուսային համաձայնություն հակամարտության կարգավորման հիմնական կետերի ու տարրերի շուրջ, ապա պատերազմից հետո իրավիճակը փոխվել է եւ հիմա ԵԱՀԿ Մինսիր խմբի համանախագահ երկրների մոտեցումներն էլ տարբեր են իրավիճակի եւ հակամարտության կարգավորման հարցերում։ Գուցե ՌԴ ԱԳ նախարարը տարածաշրջան է գալիս իր սեփակա՞ն օրակարգով, ասենք այսպես՝ «Լավրովի պլան-2»-ով։ Հաջորդը։ Այցի օրակարգում կլինի նաեւ Սյունիքի, այսպես ասած «Մեղրիի միջանցքի» հարցը։ Հավանաբար կամփոփվի այս հարցում ՀՀ եւ ՌԴ մոտեցումները, ճշգրտելու առաջիկա զարգացումների տրամաբանությունը։ Հարցերն իհարկե շատ են, այդ թվում նաեւ հայաստանյան ներքաղաքական։ ՌԴ ԱԳ նախարարն հավանաբար տպավորություն է կկազմի, թե ինչպիսին են գործող վարչապետի դիրքերը, արդյո՞ք նա է այն իշխանության գլուխը, ում հետ պետք է պլանավորել հետագա գործակցությունը։
Երեւանից հետո ՌԴ ԱԳ նախարարը մեկնում է Բաքու, ի դեպ, 4 օրյա ընդմիջումից հետո։ Հետաքրքիր է, թե ինչու 4 օր հետո։ Ինչեւէ, Բաքվում քննարկվելիք հարցերը քիչ չեն, գուցե ավելի շատ են, քան Երեւանում քննարկվելիքները։ Արդեն թվարկածս հարցերից զատ, որոնք ուղիղ վերաբերում են նաեւ Ադրբեջանին, Բաքվում հավանաբար անդրադարձ կլինի «Իսկանդերի» չարչրկված թեմային, ռուս խաղաղապահների գործունեությանն ու նրանց մասնակցությանը Արցախում կայանալիք ռազմական շքերթին, եւ իհարկե՝ Ադրբեջանի ԵԱՏՄ-ին անդամակցելու հեռանկարին։ ՌԴ ԱԳ նախարարի տարածաշրջանային այցը մեկնարկել է, սպասենք պաշտոնական հաղորդագրություններին ու հայտարարություններին։
