Ի դեպ. ԲԴԽ նախագահի շուրջ զարգացումների մասին
Ի դեպԻ դեպ, կար ժամանակ, երբ հանրային-քաղաքական, մասնագիտական շրջանակների ուշադրության կենտրոնում ՍԴ-ի շուրջ զարգացումներն էին։ Իշխանությունը որոշել էր, որ ՍԴ-ում ճգնաժամ կա եւ համառորեն ու հետեւողականորեն փորձում էր լուծել այդ ճգնաժամը։ ԱմԵնատարբեր նախաձեռնություններով՝ իրավական ու քաղաքական։ Ամեն օր մի նոր պատմություն էինք լսում՝ Հրայր Թովմասյանի, նրա սանիկների ու «ճտիկով» գրիչի մասին։Հետո Հրայր Թովմասյանը հեռացվեց ՍԴ նախագահի պաշտոնից, ՍԴ-ն համալրվեց նոր դատավորներով, ճգնաժամը կարծես թե լուծվեց, իսկ այն բանից հետո, երբ հակասահմանադրական չանաչվեց 300.1 հոդվածը, Անդրանիկ Քոչարյանն ասաց, թե իրենք ընտրել ենք ՍԴ սխալ անդամներ։ Ասաց՝ մեկը՝ ես, ներողություն իմ կայացրած սխալ ընտրության համար: Սա ի դեպ, կամ իմիջիայլոց։ Հիմա մի ճգնաժամ էլ ԲԴԽ-ում է հասունացել։ Չար լեզուներն ասում են, թե ԲԴԽ նախագահ Ռուբեն Վարդազարյանը, որ նախագահ է ընտրվել դատավորների կողմից, բնավ էլ իշխանության «սրտի» նախագահը չէ, եւ նրա նկատմամբ վերաբերմունքն էլ բնավ «շաքար» կամ «շոկոլադ» չի եղել։ Իսկ այդ առանց այդ էլ «ոչ շոկոլադային» հարաբերություններն էլ ավելի են դառնացել Ռուբեն Վարդազարյանի հայտնի «մարտակոչից հետո» երբ նա խոսեց դատավորների առաքելության, մեր երկրում անկախ դատական իշխանության, դատավորների պատվի եւ արժանապատվության մասին. Մեջբերում-հիշեցում՝ «Այսօր է, թերևս, առարկայական ու վերջնական տրվելու հանրությանը ալեկոծած և դատավորներիս համար ամոթալի չարաբաստիկ հարցի պատասխանը. մենք պատերի տակ վնգստացող դատավորնե՞ր ենք, թե՞ հայրենիքին նվիրված ազնիվ պրոֆեսիոնալներ»։ Իսկ այն բանից հետո, երբ ԲԴԽ անդամ ընտրվեց Գագիկ Ջհանգիրյանը, շատերն էին կանխատեսում, պատկերավոր ասած՝ գրոհ ԲԴԽ նախագահի ուղղությամբ։ Եւ ահա օրերս հայտնի դարձավ, որ ԲԴԽ նախագահ Ռուբեն Վարդազարյանի դեմ քրեական գործ է հարուցվել։ Այս տեղեկությունը հաստատել է Հայաստանի գլխավոր դատախազությունը, հավելելով, որ քրեական գործի մանրամասները հրապարակման ենթակա չեն։ Դատախազությունից հայտնել են, որ գործի հարուցման համար ԲԴԽ համաձայնությունը չի պահանջվում, քանի որ այն կապված չէ Վարդազարյանի մասնագիտական գործունեության հետ։ Իսկ Բարձրագույն դատական խորհուրդը որոշում է կայացրել Ռուբեն Վարդազարյանի լիազորությունները կասեցնել որպես դատավոր և որպես ԲԴԽ անդամ (նախագահ)՝ մինչև վերջինիս նկատմամբ հարուցված քրեական գործով վարույթի ավարտը։ Ինքը, Վարդազարյանն ընդգծում է, որ իր լիազորությունները կասեցված են, եւ ոչ դադարեցված եւ խոստանում է փակագծերը բացել մամուլի ասուլիսում։ Այս «խմորը» եւս, ենթադրում է, շատ «ջուր քաշողներից» է։
