Մենք քաղաքական Սարդարապատի վիճակում ենք և դասական լուծումները որևէ բան չեն տալու. Վարուժան Ավետիսյան

Ազգային-ժողովրդավարական բևեռն այսօր հավաք-երթ կանցկացնի Հարավ-Արևմտյան թաղամասում։

ArmDaily.am-ի հետ զրույցում «Սասնա ծռեր» կուսակցության վարչության անդամ Վարուժան Ավետիսյանն, անդրադառնալով հարցին, որ եթե արտահերթ ընտրությունների անցկացման շուրջ համաձայնություն լիներ ու ընթանար քարոզարշավ, ապա նման հավաքների անցկացումը ընկալելի կլիներ, ո՞րն է Բևեռի պարբերաբար հավաքների անցկացնելու նպատակը, պատասխանեց, որ առկա համակարգում որևէ լուծում չկա և ընտրություններն էլ այս համակարգում լուծում չեն։ «Այն մոտեցումը, որ դասական, սովորական մի վիճակ է և դասական գործընթացները պետք է ակտիվանան միայն ընտրությունների հետ կապված՝ 33 տարիների ընթացքում մեզ ուղղակի թաղել են ճահճի մեջ և հիմա էլ այդ սուզումը շարունակվում է։ Մեր պայքարը համակարգի փոփոխության համար է ռուս-թուրքական փակուղուց դուրս գալու, հենց այդ նախկինների ու ներկաների փակուղուց դուրս գալու համար է, իսկ մյուս դեպքում պայքարը կերակրատաշտի համար է։ Ժողովրդին կեղեքելու, պետությունը յուրացնելու, ազգային շահը վաճառելու հնարավորության համար է, բնականաբար, մենք չենք կարող ընդհանրություններ ունենալ»։ 

Նրա դիտարկմամբ՝ այս իրավիճակից ելքը ժողովրդի կամքի համախմբումն է և ժողովրդի կամքի պարտադրմամբ անցումային կառավարման ապահովումն է՝ անցումային ծրագրով և անցումային կառավարության միջոցով։

Դիտարկմանը, թե նույն անցումային կառավարության ձևավորման մասին խոսում է նաև Բաղրամյան պողոտայում հավաքվող ընդդիմությունը՝ նա պատասխանեց, որ, այո, որովհետև նախ դա ակնհայտ օբյեկտիվ անհրաժեշտություն է։ «Գործող համակարգի բոլոր սուբյեկտները, գաղտնիք չէ, որ միշտ էլ յուրացրել են իրական գաղափարները, պղծել են դրանք և ձգտել են օգտագործել իրենց ճղճիմ նպատակների համար։ Եթե հիշում եք՝ 2013 թ-ից սկսած այդ մոտեցումը սկսեցին յուրացնել։ Օրինակ, մեր ռազմավարական հայեցակարգի անվանումից սկսած՝ «Նոր որակի պետություն», «Նոր Հայաստան», հետո՝ «Ազգ -բանակ», հիմա էլ դրանք յուրացվում են ու շահարկվում, մինչդեռ ամեն ինչ արվում է՝ 180 աստիճանով տարբերվում է այս վերնագրերի իրական նպատակներից»։

Հարցին, եթե մերժում են նաև ընտրությունների գաղափարը, ապա ինչպե՞ս է ժամանակավոր կառավարություն ձևավորելու, ի վերջո, նաև Բաղրամյան պողոտայում հավաքված ընդդիմադիրներն են խոսում ժամանակավոր կառավարության ձևավորման մասին, ով է լինելու իրենց պատկերացրած կառավարության ղեկավարը, ովքեր են ներգրավված լինելու այդ կառավարությունում՝ նշեց, որ ղեկավարի հարցն ամենավերջին հարցն է, որ պետք է որոշվի։ Նախ՝ պետք է ծրագրի շուրջ լինի համազգային ներառական համաձայնություն։ «Ես նկատի ունեմ առողջ քաղաքական շրջանակներին և գործիչներին, ոչ թե կերակրատաշտի համար պայքարողներին։ Ծրագրի շուրջ համաձայնություն գալուց հետո արդեն կորոշվեն ժամանակավոր անցումային կառավարության կազմավորման մեխանիզմը, սկզբունքները։ Մեր կողմից այդ մասին խոսում ենք, բայց վերջնական որոշումը պետք է ազգային համախմբման ամփոփմամբ լինի։ Մենք քաղաքական Սարդարապատի վիճակում ենք և դասական լուծումները որևէ բան չեն տալու։ Եթե, այնուամենայնիվ, գնան արտահերթ ընտրություններ անցկացնելու ճանապարհով, ապա քաոսը, էս ճահճային վիճակը էլ ավելի կխորանա»։