Ընդդիմության երթը, որը սկիզբ առավ Բաղրամյան պողոտայում կայացած հանրահավաքից հետո, թեքվեց դեպի Պռոշյան փողոց, ապա Պարոնյան փողոցով հասավ Մյասնիկյան արձանի մոտ, Վազգեն Սարգսյան փողոցով մինչեւ Հանրապետության հրապարակ: ԱԳՆ-ի եւ դատախազության շենքերի մոտ ցուցարարները կոչեր հնչեցրեցին:
Մասնավորապես, ՀՅԴ անդամ Գեղամ Մանուկյանը ԱԳՆ-ի մոտ հայտարարեց, որ սա ամենախեղճ նախարարությունն է. «Խեղճ եմ ասում, մեղկ եմ ասում, որովհետև նրանք կատարում են խելագար և անիմաստ հանձնարարականներ: Խեղճ ու կրակ դիվանագետներ, որովհետև վարչապետի աթոռը զբաղեցնողի դավաճանության, խելագարության, անպատասխանատվության պատճառով ամեն օր խայտառակվում են»:
Մանուկյանը Դատախազության շենքի մոտ հայտարարեց. «Սա այն կառույցն է, որը պաշտպանում է Նիկոլ Փաշինյանի գրասենյակում գրված մեղադրանքները: Մենք պարբերաբար ձեզ հիշեցնելու ենք ձեր պրտականությունը՝ դուք ունեք մի կարեւոր խնդիր՝ ձերբակալել գերագույն գլխավոր դավաճանին»:
Իսկ երբ երթը հասավ կառավարության շենքի մոտ, երթի մասնակիցները ցուցադրաբար մեջքով շրջվեցին:
Այստեղից երթը մտավ Նալբանդյան փողոց, Սայաթ Նովա, ապա Բաղրամյան պողոտա: Այստեղ բազմաթիվ ավտոբուսներ էին կայանված, որտեղ ոստիկաններ էին: Գեղամ Մանուկյանն ասաց. «Նայեք, թե քանի ավտոբուս է կանգնած ու չափեք Նիկոլի վախը: Այնքան է վախենում, որ ամբողջ ոստիկանությանը հավաքել, բերել է Երեւան»:
Երթն ավարտվեց այնտեղ, որտեղից սկսվել էր՝ Բաղրմյան պողոտայում:
