Մենք շատ համբերատար և կիրթ ազգ ենք. սրանից մոտ մեկ ամիս առաջ Իսպանիայում մի ռեպեր ձերբակալեցին, հարյուր հազարներով դուրս եկան փողոց երիտասարդները, մոլոտովի կոկտեյլներով, մեքենաներ վառելով պայքարեցին: Այս մասին, այսօր՝ մարտի 6-ին, Բաղրամյան պողոտայում ընդդիմության հանրահավաքի ժամանակ հայտարարեց «Հայրենիքի փրկության շարժման» վարչապետի թեկնածու Վազգեն Մանուկյանը:
«Մենք կորցրել ենք մեր հայրենիքի զգալի մասը, ջարդվել է մեր բանակը, կորցել ենք հազարավոր երիտասարդներ, Ալիևն արհամարհանքով խոսում է հայերի մասին, այն վախեցած Ալիևը, որ ծպտուն չէր հանում։ Մենք համբերատար տանում ենք մեր պայքարը: Միգուցե դա լավ է, չգիտեմ: Այն մարդիկ, որոնք պահանջում են Նիկոլի հրաժարականը, բայց միացած չեն մեզ, անհամեմատ ավելի շատ են, քան այստեղ հավաքվածները: Տարբեր պատճառներով, ես կոչ եմ անում իրենց՝ էս հայրենիքը ձերն էլ է, միայն մերը չի: Չեք ուզում մեզ հետ համագործակցել, ստեղծեք ձեր կազմակերպությունները, ինքնուրույն որոշումներ ընդունեք, ինչքան ցանցային լինի, անկանխատեսելի լին, այնքան շուտ կհասնենք մեր նպատակին»:
Նա նշեց, որ մարդիկ, ովքեր պահանջում են Նիկոլի հրաժարականը ու միացած չեն իրենց, անհամեմատ ավելի շատ են, քան այստեղ հավաքված մարդիկ։
«Կոչ եմ անում իրենց՝ ուզում եք միանալ, միացեք, ուզում եք համագործացել՝ համագործակցեք։ Չեք ուզում համագործակցել, ստեղծեք ձեր կազմակերությունները, ինքնուրույն որոշումներ ընդունեք։ Համբերել հնարավոր չէ, մեր աչքի առաջ մահանում է մեր պետությունը։ Իսկապես մեր ազգը մահանում է։
Մենք պատմական ժամանակաշրջանում ենք ապրում։ Մեզանից է միայն կախված, որ ինչ որ թափթփուկ, անպիտան մարդիկ ուղղակի նստել են ղեկին։ Նախկին իշխանություններին մեղադրում էին՝ փող են բաժանում ընտրությունների ժամանակ։ Իհարկե, իշխանությունն էլ, ընդդիմությունն էլ բաժանել են։ Իրենց գրպանից փող էին բաժանում, որ գային պաշտոնի։
Սա մեր պետական գրպանի փողը բաժանում է ոստիկանությանը, որ իրեն ծառայեն։ Ո՞րն է ավելի մեծ հանցագործություն։ Այսինքն միայն իր հենարանը մնացել է փող բաժանելով ոստիակնությունը։ Համոզված եղեք, շատ թույլ է այս իշխանությունը, սարսափելի վտանգավոր մեր երկրի համար»,- ասաց Վ. Մանուկյանը։
Նա նշեց, որ երկրին պետք են ընտրություններ, որպեսզի ժողովուրդն իր կամքով ընտրի իր ղեկավարներին, բայց ոչ Փաշինյանի օրոք, քանի որ ոչ բարոյական իրավունք ունի, ոչ հնարավորություն․ «Ո՞նց կարող է լինել ընտրություններ ոստիկանական պետությունում։ Այս պետությունն արդեն ժողովրդավարական պետություն չէ, ոստիկանական պետություն է։ Իրեն կհանենք, կձևավորվի ժամանակավոր կառավարություն։ Մի քիչ կկայունանա վիճակը, գոնե կիմանանք, որ դավաճաններ չեն այնտեղ, կկազմակերպենք մաքուր ընտրություն, մեկդ մյուսին պետք է վերահսկեք»։
Ինչ վերաբերում է ԶՈւ ԳՇ պետ Օնիկ Գասպարյանին պաշտոնից ազատելու վերաբերյալ Փաշինյանի առաջարկին ու իրենց պահանջին՝ նախագահն այն ուղարկի ՍԴ, Մանուկյանն ասաց, որ դեռ չի ուղարկել, բայց պահանջելու են, որ կատարի իր պարտքը։
«Պահանջելու ենք և ինքը պետք է կատարի իր պարտքը։ Եթե չի կատարում այդ պարտքը, Շուշիի անկումն էլի իր խղճի վրա է»,- ասաց Հայրենիքի փրկության շարժման վարչապետի միասնական թեկնածուն։
Նա կոչ արեց բանակին՝ ձեր մեջքի հետևում Հայաստանն է, ձեր որոշումից, ինչպես պատերազմի ժամանակ էր շատ բան կախված, նույնը հիմա է, պատերազմը շարունկավում է։
«Ոչ մի հրամանի չպետք է ենթարկվենք՝ ինչ կորոշի այս դատարանը, ՍԴ, դրանից արդեն անցել ենք։
Պետությունը մահանում է, պետության փրկումը ցանկացած օրենքից ավելի բարձր է։
Լինենք քաղաքակիրթ, համբերատար, բայց չափավոր։ Ասում են՝ ժողովուրդն իրավունք չունի ապստամբություն բարձրացել։ Ո՞վ ասաց։ Եթե ժողովրդին սպանում են, ժողովուրդը պետք է ենթարկվի՞։ Պետք է կարողանանք ոտքի կանգնել, համախմբվել ու հաղթել։
Ազգ, բանակ, հաղթանակ»,- ասաց Վազգեն Մանուկյանը։
