Ի դեպ, ԱԺ-ում կայացած քննարկման մասին, կամ՝ ցավալի իրողությունները Սյունիքում
Ի դեպԻ դեպ, ԱԺ-ում այսօր աշխատանքային քննարկում էր կազմակերպվել՝ սահմանամերձ շրջաններում ստեղծված իրավիճակի, առկա խնդիրների, լուծման ուղիների, սահմանների ճշգրտման, պահպանության եւ անվտանգության ապահովման հարցերի վերաբերյալ։ Անդրադառնալով այս հարցերին, Կապանի քաղաքապետը մի շարք բացահայտումներ արեց, կամ ինչպես ասում են, ցավալի իրողություններ արձանագրեց։
Նա ասաց, որ ունենք երեք խնդրահարույց ճանապարհ` Կապան-Գորիս, Կապան-Ճակատեն և Կապան-Ագարակ: Կապան-Գորիս ճանապարհը գործում է, Կապան-Ճակատենը գործում է, սակայն Կապան-Ագարակ գյուղ տանող հատվածը ստիպված են չօգտագործել, քանի որ այն ամբողջովին անցել է թշնամու հսկողության ներքո։ «Ճանապարհը չօգտագործելու պատճառով` որոշ առումով Ագարակ գյուղի, Եղվարդի և Ուջանիսի գյուղացիները շրջափակման մեջ են ընկել»,- նշեց Գևորգ Փարսյանը:
Նա բավական ուշագրավ մանրամասներ հաղորդեց այն մասին, թե ինչպես է թշնամուն զիջվել մեր դիրքերը։ Ըստ այդմ, նոյեմբերի 9-ից հետո, հաշվի առնելով որ եռակող հայտարարության մեջ այդ դիրքերի մասով որեւէ խոսք չկա, եւ հնարավոր համարելով, որ առաջիկայում կարող է կռիվ լինի այդ հողերի համար, նրանք ամրացել են այդ դիրքերը, պաշտպանության երկրորդ, երրորդ բնագիծ են կառուցել, բայց իրենց համար շատ անսպասելի, դեկտեմբերի 17-ին հրաման են ստացել իջնել դիրքերից։ Բարձրաստիճան զինվորականները, ում հետ համագործակցել է Կապանի քաղաքապետարանը, նույնպես տեղյակ չեն եղել, որ այդ դիրքերը պետք է զիջվեն։
Կապանի քաղաքապետը հարցը բարձրացրել է ՊՆ-ի հետ հանդիպմանը եւ ստացել է պատասխան, որ համաձայնությունը եղել է ի սկզբանե, եւ որ նոր բանակցություններով ինչ որ բան փոխելը բացառվում է։ Այստեղ բնականաբար հարցեր են առաջանում։ Ի՞նչ է նշանակում՝ համաձայնությունը եղել է ի սկզբանե։Արդյո՞ք դա նշանակում է, որ հայտարարության հրապարակված տեքստից զատ եղել են եւ կան նաեւ բանավոր պայմանավորվածություններ, որոնց մասին ժամանակին չեն բարձրաձայնել, ինչ-ինչ նկատառումներով։
Իսկ գուցե ոչ միայն բանավոր պայմանավորվածություններ, այլեւ փաստաթղթի չհրապարակված հավելվա՞ծ կա, որի մասին մեզ ոչինչ հայտնի չէ։ Հիշեցնեմ, հայտարարության ստորագրումից հետո վարչապետը բացառեց նման հավելվածի առկայությունը, ԱԺ-ում նա հայտարարեց, որ հրադադարի եռակողմ հայտարարությունը ոչ մի հավելված չունի։ Լավ, եթե հայտարարությունը ոչ մի հավելված չունի, այդ դեպքում ինչպես է ստացվում, որ մենք անընդհատ բախվում ենք նմանատիպ ցավալի իրողությունների, որոնց մասին հայտարարության մեջ նշված չէ։ Գուցե հարկավոր է եւս մեկ ամբողջական պարզաբանում։Ի վերջո հասարակությունն իրավունք ունի իմանալ ամբողջ ճշմարտությունը, եթե նույնիսկ այն անտանելի դառն է։
