Ի դեպ. Ներքաղաքական իրավիճակի մասին, կամ՝ «կենացները քաղցրանում են»

Ի դեպ. Ազգային փրկության շարժում կոչվող ընդդիմադիր միավորումն այսօր Նիկոլ Փաշինյանի հրաժարականի պահանջով Հայաստանի Հանրապետության տարածքում հայտարարել էր համապետական գործադուլ, դասադուլ, անհնազանդության զանգվածային միջոցառումներ, եւ հանրահավաք Հանրապետության հրապարակում։ Ցուցարարները շրջափակել էին կառավարության, դատախազության ու Կրթության նախարարության շենքերը, հայտարարվեց, որ մարզերում ևս մայրուղիները փակ են, որ բազմաթիվ ընկերություններ ու գործարաններ միացել են գործադուլին, կոչ արվեց մարդկանց պատրաստվել հրապարակում գիշերելուն։ Հետո հրապարակում հայտնվեցին վրանները։

Մինչ այդ, հնչեց առաջարկը խորհրդարանական «Իմ քայլը» խմբակցությանը, վերջնագրային լեզվով։Ժամանակ էր տրվում՝ ներկայանալու եւ շարժման ղեկավարության հետ քննարկելու ստեղծված իրավիճակը։

Խորհրդարանական մեծամասնության պատգամավորներից մեկն արձագանգեց, թե չի պատրաստվում որևէ ֆորմատով, որևէ քննարկման մասնակցել երկիրը տարիներով քանդած, նախկին կոռումպացված և ազգադավ իշխանությունների և նրանց մնացորդների հետ։ Եւ որ Հայաստանի Հանրապետության քաղաքացին իրենց տվել է վստահության քվե ոչ թե նախկինների հետ հանդիպելու և որևէ հարց քննարկելու, այլ այն պայմանով, որ երբևէ թույլ չեն տալու նախկինների վերադարձը։ Թավիշ՝ չի լինելու։

Ինչպես ասում են՝ կենացները քաղցրանում են։ Մի կողմից վերջնագիր, մյուս կողմից համարժեք կոշտությամբ պատասխան։Դատելով ընդդիմության գործողություններից ու հայտարարություններից, շարժումը շատ մարտական է տրամադրված, պայքարը տանում է դեպի վճռորոշ փուլ, արագընթաց զարգացումների ու նույնքան արագ հանգուցալուծման տրամաբանությամբ։ Իշխանությունը սրանից առանձնապես խուճապահար չէ, համարում է, որ այն ինչ կատարվում է Հայաստանում, 2018 թվականի հեղափոխության արդյունքում իշխանությունից զրկված «էլիտայի» փորձն է՝ հասնել ռեւանշի:

Ընդ որում՝ խոսքը ոչ միայն քաղաքական էլիտայի մասին է, այլեւ բոլոր նրանց, ովքեր մինչեւ 2018 թվականը ունեցել են արտոնություններ, իսկ 2018 թվականից հետո՝ չունեն: Իշխանությունն այն համոզմանն է, որ Ժողովուրդը, որ 2018 թվականի հեղափոխությունից հետո զգացել է իր իշխանություն լինելու հանգամանքը, չի ուզում կորցնել այդ կարգավիճակը։ Իսկ ժողովուրդը...Մի մասը ընդդիմության հետ է, մի մասը իշխանության, մյուս մասն էլ՝ իր դարդ ու ցավի։ Իսկ քաղաքական բեւեռներից որ կողմի հաշվարկներն են ճշգրիտ, եւ ում են սխալ զեկուցում իրավիճակը, առաջիկա օրերին կերեւա։

Այս թեմայով Ի դեպ. Նիկոլ Փաշինյանի առաջարկի ու Արա Այվազյանի հրաժարականի մասին Ի դեպ. Հայ զինվորների գերեւարման ու Նիկոլ Փաշինյանի նոր առաջարկի մասին Ի դեպ. Ադրբեջանական ագրեսիայի, ՀԱՊԿ-ից ակնկալիքների ու ՄԱԿ ԱԽ չդիմելու մասին Ի դեպ. Լեւոն Տեր Պետրոսյանի հոդվածին Ռոբերտ Քոչարյանի պատասխանի մասին Ի դեպ. Լեւոն Տեր Պետրոսյանի հոդվածի մասին