Ի դեպ. Հումանիտար հրադադարի ռուսական նախաձեռնությանը ՌԴ ՊՆ-ի ներգրավվելու մասին
ADTVԻ դեպ, այն բանից հետո, երբ Թուրքիայի «թեթեւ ձեռքով» ձախողվեց հումանիտար հրադադարի ռուսական նախաձեռնությունը, ռուսական քարոզրությունը հրապարակ նետեց այն թեզը, թե «չեն լսում Լավրովին, ստիպված կլինեն լսել Շոյգուին»։ Այս փուլում դա չէր նշանակում ՌԴ-ի անմիջական ռազմական ներգրավվածություն, հաշվի առնելով ռուս-ադրբեջանական բարեկամական ու ռուս թուրքական գործընկերային հարաբերությունները։ Բայց խնդիրն այլեւս վերաբերում է ոչ միայն հայ-ադրբեջանմական հակամարտությանը, որտեղ ՌԴ-ը սովոր էր ներկա լինել «արբիտրի» կարգավիճակում, այլ տարածաշրջանում իր դերին, հեղինակությանն ու ռազմաքաղաքական ազդեցությանը։ Եւ ուրեմն, Ռուսաստանի ԱԳՆ-ից հետո, կամ ավելի ճիշտ նրան զուգահեռ խաղի մեջ մտնելու հերթը ՊՆ-ինն էր՝ առայժմ փափուկ խաղի։ ՌԴ ՊՆ-ն այսօր հայտարարել է, որ իր իրավասությունների շրջանակում աշխույժ աշխատում է Լեռնային Ղարաբաղում իրավիճակի արագ կայունացման ուղղությամբ ՌԴ նախաձեռնությունը կյանքի կոչելու համար։
Շոյգուի վարած բանակցությունների հիմնական նպատակը «Լեռնային Ղարաբաղում ռազմական գործողությունների անհապաղ դադարեցումն է և հակամարտող կողմերի բանակցությունների վերսկսումը տարածաշրջանում իրավիճակը կարգավորելու համար»: Ռուսաստանի Պաշտպանության նախարարությունը մտահոգված է Մերձավոր Արևելքից Լեռնային Ղարաբաղի հակամարտության գոտի ահաբեկչական խմբավորումների տեղափոխման մասին տեղեկություններով, այսօր լրագրողներին հայտնել են ռազմական գերատեսչությունում:
Շոյգուն իր ասելիքը ասել է, բայց ուշագրավ է, որ Ռուսական մամուլում նախ հայտնվել էր թուրքական կողմի հաղորդագրությունը, որտեղ նշվում է, թե ինչ է ասել Աքարը։ Իսկ նա ասել է, որ Թուրքիան աջակցում է եւ աջակցելու է Ադրբեջանին այս պատերազմում, եւ որ հայկական զորքը պետք է դուրս գա «տարածքներից»։
Ռուսաստանն անկասկած ուժեղացնելու է իր ճնշումները Թուրքիայի վրա, կոնկրետ արդյունքներ ստանալու համար, եւ այս հարցում ակտիվ շփումների մեջ է նաեւ գործընկերների հետ։ Կոնկրետ արդյունքներ, դատելով ստեղծված իրավիճակից ու հետագա հավանական զարգացումներից, առաջիկայում լինելու են, իսկ մինչ այդ թուրք ադրբեջանական ռազմական ագրեսիան շարունակվում է, Անկարան և Բաքուն փորձում են մինչեւ հավանական հրադադարը, ամեն գնով հասնել ինչ որ շոշափելի ռազմական հաջողության՝ հազարավոր զոհերն ու անթիվ անհամար ռազմական տեղնիկայի կորուստը ադրբեջանական հանրության մոտ ինչ որ կերպ արդարացնելու եւ որպես թվացյալ հաղթանակի համար վճարված գին ներկայացնելու համար։ Բայց ինչպես հաղորդում է ՀՀ ՊՆ ներկայացուցիչը,մեր զորքերը հերոսական ու համառ մարտեր են վարում եւ հետ են մղում թշնամու հարձակումները։ Այլ տարբերակ չունենք, հաղթելու ենք։
