Ի դեպ. Կարանտինի եւ տուգանքների մասին
Ի դեպԻ դեպ, ԱԺ-ի այսօրվա արտահերթ նիստի օրակարգում, ի թիվս այլ հարցերի, ընդգրկված էին լրացումներն ու փոփոխությունները «ՀՀ բնակչության սանիտարահամաճարակային անվտանգության ապահովման մասին», եւ «Արտակարգ իրավիճակներում բնակչության պաշտպանության մասին» օրենքներում։ Բանն այն է, որ, ինչպես նշում են խորհրդարանական մեծամասնության ներկայացուցիչները, սեպտեմբեր 11-ին ավարտվում է «Արտակարգ Դրություն» կոչվող իրավական ռեժիմը, սակայն իրավիճակը հարկադրում է շարունակել պահպանել հակահամաճարակային կանոնները։ Եվ ահա այս փոփոխություններն ու լրացումները հնարավորություն են տալիս գործող սահմանափակումները, կամ դրանց գերակշիռ մասը պահպանել արդեն ոչ թե «Արտակարգ դրության» այլ այսպես կոչված «կարանտինի» իրավական ռեժիմում։ Այլ կեպ ասած՝ առաջարկվող օրենսդրական փաթեթով հիմնականում պահպանվում է այժմ կիրառվող սահմանափակումների մի մեծ հատված։ Այլեւս չի կիրառվելու էլեկտրոնային հսկողության համակարգի միջոցով անձանց տեղորոշումը և վարակակիրների հայտնաբերումը։
Ընդդիմությունն իհարկե քննադացեց այս նախաձեռնությունը, արձանագրելով, որ այս նախագծով առաջարկվող պայմանները որևէ կերպ չեն տարբերվում արտակարգ դրության պայմաններից, որ փոխվում է միայն անվանումը, բայց իրավական ռեժիմի առումով որևէ տարբերություն չկա, որ կարելի էր ավելի ճկուն գործիքակազմ ընտրել եւ այլն, եւ այսպես շարունակ: Մի դեպքում սակայն դժվար է չհամաձայնել ընդդիմության հետ՝ խոսքը նախատեսվող տուգանքների, ասենք այսպես՝ «մենյուի» մասին է։ Կարանտինի ռեժիմը խախտելու համար տուգանքների բավական հարուստ «մեյու» է նախատեսում իշխանությունը՝ 10-ից մինչեւ 200 000 դրամ։ Օրինակ, կարանտինի ընթացքում ազատ տեղաշարժվելու կամ տրասպորտային միջոցների տեղաշարժման սահմանափակումները խախտելը 10 հազար դրամ, կարանտինային գոտի մուտքի եւ ելքի հատուկ ռեժիմը խախտելը՝ 50-70 հազար դրամ, որոշ դեպքերում վարչական տույժ նշանակելու օրվանից հետո՝ մեկ տարվա ընթացքում կրկին կատարելը՝ 150-ից 500 000 դրամ եւ այսպես շարունակ։
Տպավորություն է ստեղծվում, էր «կրիր դիմակ, փրկիր կյանքեր»-ը դառնում է «մուծիր տուգանք, փրկիր բյուջեն»։ Կամ իշխող մեծամասնությունը կամաց կամաց մոռացության է տալիս, այն, որ քաղաքացին «տուգանվելու մատերիալ» չէ։ Կամ՝ թե աղքատության ինչպիսի մակարդակ ունի մեր երկիրը, ինչքան է այն խորացել նույն համավարակի պատճառով , ինչ թիվ են կազմում ընտանիքները, որոնք ժողովրդա-խոսակցական լեզվով ասած «հացին կակա են ասում» ու «նիսյա» են գրվում թաղի խանութներում։ Առողջ եղեք։
